Ka seiñ Volunteer for a Better Jaiñtia (VBJ), ynnin ka sngi da phah chithi ko cha u Chief Electoral Officer ka Meghalaya lyngba ki District Election Officer ka West Jaiñtia wa East Jaiñtia Hills yow dawa wanrah ki kyndon krehkaam yow man ka Election kawa khooid.
Ka seiñ ini wa dep da dep thoh ko cha ki Synjuk Waheh Chnong ka thaaiñ kamjooh ha Jowai yow booh kyndon neibynta ka yalap Election yow lait nei khynnia kamjooh leh yow man ki yalap Election kiwa khooid heiwa kiwa boon da bien ki wow pynbna ya ki kyndon hawa wan yalap hapoh ka chnong ka thaw.
Ha ka chithi da ong wa ha Ri-loom Jaiñtia joor bha i pynemkaam dei bor poisa da ki kyrtong wa kiwa yahkhmat yong ki nadooh chwa wow pynbna ya ki tarik Election wei hadooh kattæ leh wei ini da ktah bha ko ya ki khynroo khyllood iwa da yah chei sih kamjooh leh ki manyung wa dooh wa duk.
Kamtæ da ong wa kam ka seiñ kwah ko wow pyndooh yeini yow pynman ya ka Election kawa hok wa khooid wa suba wei yow man sakhait kamwa thmu katæ ka synchaar paidbah.
Hajrong ini waroh da dawa na u Chief Electoral Officer wow leh u chisyndon yow wanrah ya ki kyndon lane ka rukom krehkaam wa khor yow pynchitom ya ki kyrtong kamjooh ki seiñ saiñhima khamtam ha Ri-loom Jaiñtia kiwa da pynlut phut ya ka poisa palat ya iwa da chah da ka aiñ.
