Ka seiñ JYF da e dorkhat ko ha u Chairman ka District Mineral Fund (DMF), East Jaiñtia Hills District uwa man leh kam u DC ka District u A. Baranwal wow dawa wa emkaam wow kær ya ki luti lai kjat deiwa booh Railing.
Kini ki luti lai-kjat toh kiwa da chna da ka Infra Project Ltd na Lad-Sunga (Dkhiah East) cha Khliehriat East, Jaiñtia Hills District wow yada ya ki bru paidbah kiwa lai wa wan.
Ka seiñ da ong ko wa i wym em kini ki Railing wanrah i yei syir mynsien ya ki paidbah hawa lai luti na uni u sarok khamtam wa ka Khliehriat man ko ka Headquarter ka District heiwa em boon ki dukan dukdoh, ki yaaw ki yung krehkaam, wei boon ki bru pynemkaam ki ya ka Khliehriat kam ka thaw wow lai luti cha kiwi ki chnong.
Hajrong ini waroh ka seiñ da kyntu joor ko ya u DC wow leh yeiwa emkaam deit smat khnang wow ye u yada ya ki mynsien bru.
Ka seiñ da ong ko wa ha ini i bynta u sarok da jooh jia ki kaam chah tyrrah kari dei langær ha ki por wa dadep wei da em leh ki kynti wa da dooh wot yei mynsien bru leh.
