Ka seiñ Jaiñtia Youth Federation (JYF) da beiñ joor ko yei chah siat yap u Roning Nongkynrih ha ki chipai ka BSF iwa da jia ha ka 5 tarik uni u bnai.
Ka seiñ da ong ko wa kam ini ymtoh de wow jia neini chakhmat wow chim noh yei mynsien bru khlem da toh por neibhah ini da pyntieñ pynsier mynsien ko ya ki bru wa lai wa wan ha ka thaaiñ Pynursla chadooh Dawki lada ki bru wa toh u pait yei chongsuk chongsaaiñ chim ki yei bor ha idæ wei da tyngkheiñ ki ya ka aiñ.
Kamtæ da kyrpaad ya u Symbood Montri Rangbah ka jylla uwa pait ya ka chnat Kaam Pohyung (Police), u Prestone Tynsong wow pynsmat yei phah takit wei wow kem chisyndon ya kiwon kiwon ki BSF wa emkti wow sait yap ya u Roning Nongkynrih wei wow pynchitom katkam ki kyndon ka aiñ.
Ka seiñ da dawa ko wa toh u kyrriah ya ki BSF wa em ha Mawshun cha ki thaw khappood ymtoh wow em ki ha ki chnong wa sah ki para doh para snaam yong i.
