Ka KSU-EJHDU ynnin ka sngi hapoh i yahkhmat u President, u Streamly N Suchen wa u General Secretary, u KS Suchiang deiwa emlang kiwi ki dkhot da yoh ki wow yachem wa u ADC ka East Jaiñtia Hills, u SS Syiemlieh hajrong i wym chimkhia ka NHAI ya u sarok NH06.
Neiliang u ADC da pdiang u wa u sarok NH06 da sih u cha wa palat wei da kular u wow phah ya ka chithi ka seiñ cha ka NHAI.
Hawa yatoh won wa ki ar tylli ki yingkieñ kawi ha Shymplong (RCC Bridge 54/1) wa ka yingkieñ ha chnong Lahaleiñ kiwa em ha u sarok khappood Sonapyrdi-Borghat kiwa da chah rah chah rong ha ka um neidaw wa joor u slap ha ki tayaw wa da dep.
Kini ki ar tylli ki yingkieñ toh kiwa dang sah khlem pynkreh hadooh katni wei i pynslem ka sorkar lyngba ka chnat CPWD wow pynchna thymme da booh ko hei eh wa khroo ya ki paidbah wa chong chnong cha chiliang ka wah Lukha kiwa kynthup ya ka chnong Hingaria, Huroi, Lahaleiñ, Lejri wa Baskuna.
Hawa kylli, u ADC da khana u wa heiyatoh wa kitai ki yingkieñ ka yung krehkaam yong oo da dep ko wow thoh cha u Chief Engineer CPWD, Shillong, tangwa hadooh katni ym yoh jubab iyi iyi. Heiyatoh won wa u sarok NH06, ka seiñ da ong ko wa ka NHAI toh u pynchna smat ko lym kamtæ daw chim da ka luti wa eh.
