Ka KSU Barato Unit ha ka 16 tarik uni u bnai da yachem ko wa u Executive Engineer PWD (Road) yong ka Shangpung Division, Shangpung West Jaiñtia Hills District hei yahkhmat u President yong ka Unit u H. Ehboklang Sten wa u General Secretary u Readyman Shadap kamjooh u Organising Secretary u Pynkyrhai Sten, Assistant Secretary u Pynshongdor Sten yow dawa pynyoh ya i kynroh, ki Guard Wall ha ki bynta yong ka sarok nadooh Pohblai (Veterinary Office) hadooh Moolarang.
Ka seiñ da ong ko ini i bynta yong uni u sarok Barato man i iwa dong, wa synrang wei na i por cha i por jia iwa sñiawsih kam i oor ki kari mator kamtæ toh u chna pynbait leh ya ini i thaw wa dong yow man ko iwa chngaaiñ ya kiwa lai luti.
Neiliang u sahep hapyrdi i boonkaam yong oo da chimkhia u yeini wei da kular u wow lai pait ya itai i thaw yow thooh laad wow pynmankaam yeiwa angnood ka seiñ.
Ka KSU Barato Unit da e ko leh dei thoh cha u MLA yong ka thaaiñ 4-Mowkaiaw Constituency yow chimkhia ka chnat PWD hajrong ini i kaam.
