Ka Khasi Students’ Union-War Jaiñtia Circle da beiñ joor ko ya uwi u bru uwa tip pyrtuid kam u Timun Surong hadien wa jrongkti wei dat u ya kawi ka manbei, ka Radika Lamurong na Thangbuli kawa da mynsoo joor.
Neiliang ka seiñ hadien wa yoh yutip ko yeini da lai ko wut-wut cha Thangbuli wow pait ya kani ka manbei heiwa kiwa hayung da ong ki wa uni u bru da patah yabor u ka na Amlarem da ka kari wei da dat u ka deiwa maham leh wow pam ya ka da ka wait na rdang.
Neiliang u ma kani ka manbei da ong u wa ini da jia i ha ka 29 Naikhynde heipor 11 waje i sngi wei da e FIR pyrchah ya uni u bru.
Hadien ini, ka seiñ da lai ko cha Amlarem Police Station wow thooh bniah yeini wei neiyi i daw ympu kem ya uni u bru heiwa neiliang u sahep (Officer) da ong u wa dadep Register ya ka Case pyrchah ya uni u bru weiwa ympu kem ya oo toh neidaw wa ympu biang ka Medical Report wei da sdang takit ki yeini.
Ka seiñ da dawa ko leh wow kem noh ya uni u bru hapoh 24 kynta u wym kheiñ de ya ki khynnah kynthai kiwa tlot bor wot hadooh wa da maham tynyap u ya kani ka manbei.
Kani man ko katkam ka wyrta na u General Secretary ka seiñ, u Lurman B. Talang.
