Ka Khasi Student Union-Jaiñtia Hills District Unit hapoh i yahkhmat u President u Ohibait Dkhar wa u Leningrad Tariang, Organising Secretary deiwa synran lang wa ki dkhot ka KSU Narpuh, haka 16 tarik da lai hiar ki cha Malidor yow pait yei long i man ha wah Malidor nei wan khloh moo kiwa na Assam chapoh u pood u ang ka jylla Meghalaya.
Ka seiñ da pynsñiaw ko yei sñiawsih wa pyn hajan ka chnong Malidor, ka um wa haap hapoh u pood ka jylla, da kylla madan, da kylla chyiap neidaw wa tooh moo kiwa na Assam kiwa ka Narpuh Circle la le sien da lai beh ki.
Kamtæ ka seiñ da ong ko wa lada ka sorkar ka pynslem ko wow booh Police Outpost ha katai yingkieñ, kiwa na Assam ym dam ki wow bam mynkna ya i khyndaw i chyiap lada ka sorkar ym ye ko wow e yada.
Ka KSU JHDU da yaroh ko leh ya kiwa chong chnong Ratacherra kiwa da mih paidbah wow pynsangeh yei chna sarok ka Assam wow poi hadooh cha ka wah deiwa kah da ki moo wa heh.
