Ynne ka sngi, ka KSU Nartiang Circle hapoh i yahkhmat u General Secretary u Chanbor War, u Publicity Secretary u Juhhi Tariang da lai yachem ki ya u Executive Engineer Central Division PWD Jowai hajrong i sih wa cha wa palat u sarok JNKK Road khamtam na Nartiang cha Khanduli yow dawa pynchna pynbha smat ya uni u sarok, khnang wow lait na iwon iwon i jia wa sñiawsih heiwa ki paidbah ka thaaiñ da maad ki chiboon i eh lyngba i sih uni u sarok.
Neiliang u Executive Engineer da kular u wow chimkhia hajrong ini.
Ka seiñ da dawa ko leh wa toh u booh ya ki moomær, ki Signboard ha man ki chnong wa lai lyngba uni u sarok JNKK Road.
Ynne ka jooh ka sngi, ka Namdong Unit da lai e ki dei thoh cha u CEM ka Jaiñtia Hills Autonomous District Council u Thombor Shiwat yow dawa pynbiang thaw noh-jhep ha yaw Namdong neibhah kani ka yaw toh kawa em hapoh i pait yong ka JHADC kawa hadooh katni kawa ym em thaw noh-jhep wa paka.
Kamtæ ka seiñ da ong ko wa ini da wanrah ko yei maa wa khroo ya ki para doh para snam kiwa chong wa sah hajan kani ka yaw kiwa ye wow yoh kjut wa harukom neidaw wa thang ya ki Plastic wa i jhep. Neiliang u CEM da kular u wow chimkhia ya ini.
Ka seiñ da ong ko leh wa katni da boon ki bru wa wan cha kani ka yaw iwa da yarap wow pynku yaka yaw tangwa ini da wanrah ko sa iwi i eh wa ym em thaw pynyieñ kari da iwa biang iwa da pynman yei sahkut ki kari, kamtæ da dawa leh wow chimkhia ya ini.
