Ka Khasi Students’ Union War Jaiñtia hapoh i yahkhmat yong u President u Laitphar Syngkrem, General Secretary u Lurman B Talang wa u Finance Secretary u Kindly Khyriem ha ka 19 tarik uni u bnai da lai yachem ki ya u Chief Engineer Civil Work, MeECL ha Lumjingshai wow yaklam hajrong i khut tender ka MeECL ya ka Supply and Services for the Up–gradation and Maintenance hapoh Leshka, wa ym toh du wow e du ha kawi donhi.
La seiñ da dawo ko wow leh da ka Open Tender wow yarap ya ki bru yong i wow yoh kreh neibhah wa ha kam kini ki por wa duna kaam duna jaam.
Ka seiñ ha ini i yaklam da pynsñiaw wei da dawa hakhmat uni u sahep wa toh u khut bait da ka Open Tender wei pyrchah ki leh wow yoh du kawi ka Company khamtam ki Company kiwa na baar.
Da ong wa kam kini ki kreh namo Project kiwa da ki phaw klur daw yoh ki Company wa na baar kiwa daw wanrah leh ya ki wakreh kiwa na baar kiwa daw pynyang yei maa ya ka thaaiñ waroh kawi.
Kiwa em boon ki Contractor ki yong i kiwa man kiwa biang wow kreh ya ini i kaam nadooh wa sdang i kreh hapoh Leshka, boon ki bru yong i yoh kaam yoh jaam bha ki.
Neiliang u Chief Engineer da ong u wa ka National Tender ha i yong sakhiat da khut tangwa da pynyiñsur cha ka 26 tarik uni u bnai wei hadien neitæ daw ye wow leh da ka Open Tender.
