Ka KSU-South West Khasi Hills District da dawa ko na sorkar Meghalaya wow wanrah noh ya ka Community and Rural Development Block ha Wahkaji næ ha Umdohlun yong ka South West Khasi Hills District kamwa angnood ki paidbah da slem.
Ka seiñ da ong ko wa i e C&RD Block daw yarap ko ha ki 44 tylli ki chnong ka thaaiñ Phlangdiloin, Umdohlun wa Warsan Lyngdoh neibhah ki paidbah katni haap ki hapoh ka Mawkyrwat C&RD Block heiwa hap lai ki 30 hadooh 50 km wow poi cha Mawkyrwat wei hap chong kari ki hadooh 3 kynta. Em won ki chnong wa haap hapoh ka Ranikor C&RD Block hap lai kjat ki hadooh 3 kynta wow poi cha Ranikor.
Ka seiñ nadooh u 2015 da pynsñiaw ko yeini ha ka sorkar wei ha u Thohlakhmi (Feb) 2022 leh da yachem ko ya ya u Hamletson Dohling u Montri ka chnat C&RD wow pynsñiaw yeini.
Chooh chooh da dawa ko na kiwa mihkhmat ka South West Khasi Hills District kam u Renikton L. Tongkhar, MLA Mawkyrwat, u Carnes Sohshang, MDC Mawkyrwat wa u Pius Marwein, MLA wa MDC ka Ranikor wow chimkhia ya ini i dawa ki paidbah.
