Dawa ka MCTODA Jaiñtia Hills Unit wow pynman da ka Judicial Inquiry yei chah dat tadong suloi ha ki pulit

Ha ka kyrwoh wa da phah da uwi u dkhot ka MCTODA Jaiñtia Hills Unit, da ong u wa da neh rta i sma ka Tear Gas ha oo wei iwa sakhi u heipor pyrdi synyaaw ka 4 tarik ha Mawrynkneng ymtoh wa leh katkam i kaamram ki pulit tangwa i wan hiar thma wan thombor ki pulit ya kiwa pynman yakhih deiwa jai-jai ki wym em rah ya ki tiar ki tar pynmynsoo.

Da ong u wa la palat chi tayaaw ka Meghalaya Commercial Truck Owners and Drivers Association(MCTODA) da pynman yakhih ki yow pynuiñ ya ki Truck wa kit Clinker wa Cement wa mih na ki karkhana wa em ha Jaiñtia Hills.

Wei kani ka yakhih wa jai-jai toh yow dawa yei bai kit wa Rs. 9 chi Kilometre/chi Metric Ton hapoh ki dor wa Rs.7 hadooh Rs.11 neibynta ki sarok psiang wei ini i dor toh iwa da booh da ka sorkar Meghalaya neibynta hapoh ka Meghalaya.

Kamtæ da ong wa i yakhih ki toh deiwa man ryntih deiwa ngait wa ka sorkar daw ap ko yei hok yong ki tangwa ini waroh da pra phrai hei pyrdi synyaaw ka 4 tarik dei pdung ki Tear Gas wei sympat lathi wei ini toh khlem da pynkrehkaam ya ka Section 163 ka BNSS heiwa ya kani ka hukum da pynmih ha ka 6 tarik u November, 2025 da ka Deputy Commissioner ka East Khasi Hills District. Wei ini da che kdar wa i hok manbru namo ka Human Rights da chah tyngkheiñ ko ha ki pulit.

Related posts

Yoh mynsien ki khynnah puræ na ka District Level Chief Minister Youth Engagement Programme ka West Jaiñtia

November 7, 2025

Dawa ka JNC wow pynrkhiñ yei rukom pynman Exam ka DSC wa em kiwa yoh u rah Phone chapoh

November 7, 2025

Da ong u leh wa i pynpdung Tear Gas wa i dat lathi toh iwa sdang donhi heiwa da yoo u yei mynsoo uwi uwa da heh rta uwa yah Truck uwa da ong wa ki pulit dat ki oo dei tadong suloi ym kam wow yada tangwa wow dat pynmynsoo heiwa da toh kha u nei bynta i khlieh ha i bynta hajan i chkoor iwa man leh i bynta wa ye u pynyap ya u bru “Death Spot” wei ini da man ko kam ki kaam pyntieñ pynsmiej wei pynmynsoo wa da leh da ki pulit.

Chooh chooh da ong u wa ini wa leh ki ymtoh wow pyn jai-jai ya ki paidbah tangwa i hiar thma, wow pynkulmar wei pynchitom.

Kamtæ da ong wa i emyatoh ki paidbah wa ka sorkar lada chna yingkieñ da ki tadong suloi, da man i iwa da sepai.

Wei kam uwa yah Truck da yoo che wa i dat ya ki paidbah da ki tadong suloi toh kamwa pynyap yei hok manbru wa da e cha uwi pa uwi wow pynman yei yakhih deiwa jai-jai wei hap em ki wow kitkhlieh yeini.

Hajrong ini waroh da dawa wow pynman da ka Judicial Inquiry yeiwa pynemkaam wow dat da ka tadong suloi ya kiwa pynman yakhih deiwa suk. Da dawa leh ya ka Human Rights Commission wow phah pynman ko yei takit yeini wa chah tyngkheiñ i hok manbru.