Ka Meghalaya Joint Action Committee (MJAC) kawa kynthup lang ya ka Association of Meghalaya Traders & Transporters, ka Jaiñtia Hills Trucks Owners Association waka All Jaiñtia Hills Cement & Clinker Association da thoh ki cha u Montri Rangbah ka jylla, u Conrad K Sangma wa cha u Symbood Montri Rangbah, u Sniawbhalang Dhar heiyatoh wa i dooh nong ka sorkar lyngba ki dan neidaw wym em Checkpoint næ ki Weighbridge ha ki luti wa lai cha ki karkhana pynmih khyndaw-bilat wa em ha East Jaiñtia Hills District.
Ka MJAC da kdaw ko wa ki mar wa pynemkaam ha kini ki karkhana toh kiwa da tih da pynmih na kiwa boon ki bynta ka Ri-loom Jaiñtia tangwa neidaw wym em ki Checkpoint namo ki Weighbridge kiwa booh ha ki luti wa lai cha kini ki karkhana yow pait ya kini ki kari wa kit mar, da wanrah ko yei dooh nong ya ka sorkar neibhah ym em wa khrong dan ya u mooyong kamjooh ya u moochuni wa da chalan da kiwa chong chong ka thaaiñ cha kini ki karkhana.
Kamtæ da ong wa kam ka jylla wa tlot hei bor poisa poilaiñ da emkaam bha wow pait yeini i liat ka dan wa toh u yoh ka sorkar wei da toh u booh ya ki Checkpoint næ ki Weighbridge ha kawi pa kawi ka karkhana neibynta kitu kiwa wanrah mar.
Ka MJAC da kheiñ ko wa em kamwa 800 tylli ki Truck wa kit moochuni wa 300 tylli kiwa kit mooyong kiwa psiah cha kini ki karkhana pynmih khyndaw-bilat wei boon ki por toh kiwa kit hadooh le chah yeiwa chah.
Lada kheiñ 25MT kawi ka Truck wa kit mooyong, dapoi 1,186,250 MT chi snem wei lada kheiñ 30MT kawi ka Truck wa kit moochuni, dapoi 8,760,000 MT ha chi snem iwa pynyoo wa da boon bha i dooh nong ka sorkar.
Kamtæ da ong wa da kani ka poisa ka sorkar da ye ko wow chna 100 Km u sarok man-u-snem du hapoh East Jaiñtia Hills District wei i wym chynna ka sorkar yeini da man i dooh nong wa joor bha.
Discussion about this post