Dawa ka Movement for Change wow booh lang wei ktien Pnar haka Meghalaya State Anthem

Ka Movement For Change, Meghalaya India da yieñ u wow dawa kynthup lang wei ktien Pnar napoh Ri Jaiñtia haka Meghalaya Anthem.

Katkam ka Wyrta wa da phah da u Pherdian Samayang kam u President wa u C. Sungoh kam uwa e ktien, da ong ki wa i dawa wow booh lang wei ktien Pnar haka Meghalaya Anthem man i iwa chongñia neibhah nadooh ki por warim wa jah em i yong i hi ka ri namo ka Hima, em i leh ki yong i hi ki syiem kam ki Syiem Madur, Syiem Maskut, Sajar Nangli, Syiem Latympang wa kiwi kiwi.

Katkam wa da em hei thoh, hadien wa da chem yaka Hima Jaiñtia ha u snem 1500 A.D, u Parbat Ray man u u Syiem wa nyngkong dooh yong ka, kamtæ ter ter hadooh u Syiem Rajendra Singh ha u snem 1833-35 wada synchar noh da ka sorkar pharæng. U pood u ang ka Hima Jaiñtia heitæ i por da heh da yaar ko nadooh na Wah Umngot chadooh wah Umïam cha liang sepngi waroh ka Sylhet District yong ka Bangladesh chiteiñ ka Dima Hasao District wa waroh kawi ka Karbi Anglong. Heipor wa synchaar ka sorkar pharæg leh ym em u pynhaap lang ko yei synchaar khadar yong ka chirup waki Khasi. Da thung ki da ka yong ki hi ka bynta kawa tip i kam ka Jowai Civil Sub-division.

Nadooh i por warim wajah datip yaka ri yong i kam ka Ri Khasi Jaiñtia, Khasi kamut wa chong da ki Khasi ki Khynriam, Jaiñtia mut wa chong wa sah da ki Pnar. Da tip leh yaka kam ka Ri ki Lephaw Syiem wa Khad-ar Dolloi, Lephaw Syiem mut ka Ri Khasi, Khad-ar Dolloi mut ka Ri Jaiñtia kawa tip yaka kam Jaiñtia Kingdom næ Jaintiapur hei ktien dkhar.

Related posts

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

Da 4 lak tam ki Vote jop ka Priyanka Gandhi ha ka Election wa nyngkong yong ka

November 23, 2024

Heipor wa wan ka Indira Gandhi, ka Prime Minister ka ri India wow pynbna jylla yaka Meghalaya leh da klam che ko wada e jylla yaka Meghalaya nei wynta ki le jaitbru kitæ toh ki Khasi, Jaiñtia wa Garo. Hajrong ini da em leh jar jiar ka District Council kawa yieñ sakhi wa i ki Pnar em i ka yong i hi ka jaitbru ka riti ka dustur ka ktien u thylliej. Kamtæ em hok em yurim i wa i ktien Pnar u em ki haka State Anthem.

I ong u Montri Rangbah, u Conrad K Sangma wa da chna yaka Meghalaya Anthem katkam i kyndon aiñ, neibhah i ktien English man ko kam ka Official Language katwa ka ktien Khasi wa ktien Garo kam ki Associate Official Language yong ka jylla. Lada ong u kamtæ sa i ktien Pnar leh toh u man i kam i Associate Official Language yong ka jylla. Lada pait i haki kot ki sla haki General Knowledge wa kiwi kiwi leh da thoh ki wa i ktien wa em ha Meghalaya toh i ktien Khasi, Jaiñtia (Pnar) wa Garo.

I dawa wow booh lang wei ktien Pnar haka Meghalaya Anthem ym em u mut i wow tympra jaitbru, tangwa u pynkhlan yaka jaitbru wow wanrah yei yatylli ya ryntih. Ym em leh u man i wow khanglaad yei dawa wow pynpsiah yei ktien Khasi haka 8^th Schedule yong ka riti synchaar ka ri India. Heini i dawa toh iwa krehlang hi i chirup.

Ka Movement e ko yei kyrchaan wei yakrehlang hei dawa wow booh lang wei ktien Pnar ki Jaiñtia haka Meghalaya Anthem.