Khliehriat: Ka seiñ Meghalaya People United Front-East Jaintia Hills District (MPUF-EJHD) ha ka kyrwoh wa phah da u President ka seiñ u Michal Chyrmang, da ong wa ka seiñ ka pyrchah wei dawa ko naka JHADC hapoh i yahkhmat u Thombor Shiwat kam u CEM wow pyndam noh yaka NOC kawa da e cha ki 3 tylli ki Coke Plant kawi kawa em ha Deinling kawa haap hapoh ka Elaka Rymbai wa artylli won kiwa em ha thaaiñ Soo Kilo kiwa haap hapoh ka Elaka Sutnga neibhah lada kitai ki Company yoh ki wow pynyieñ yaki karkhana, i maa ya i chait i khiah u paidbah lyngba ki pum pum wa i tdem wa mih na kitai ki karkhana heipor wa thang ya u mooyong toh iwa da yang chwa.
Wei kamwa yoo ka seiñ leh wa kiwon kiwon ki karkhana kiwa wan hapoh East Jaiñtia ym em e myntoi ko ya ki paidbah ka jylla lada pait nadooh ki karkhana pynmih khyndaw-bilat ki wym wanrah yaka roi ka paar.
Da ong leh wa kini ki karkhana ym jooh burom ki yaka soskular wa da ya soi wow e kreh 60% yaki tre jylla kawa man du wow pynbiej bru donhi heiwa boon ki baar jylla wa kreh ha ki.
Hapoh East Jaiñtia da em hadooh 9 tylli ki Cement Plant, kawi ka Coke Plant wa sa 3 tylli ki Coke Plant kiwa dang lai chakhmat wow pynkreh, wei heiwa yoo ka seiñ, ka JHADC ym em ko iwon iwon i bhah yong ka na kitai ki karkhana hadooh wym yoh ko wow su tulop ya ki wakreh la 9 bnai.
Ka seiñ daw phah ko leh yei thoh cha ka JHADC wa cha ka State Pollution Control Board wow dawa pyndam noh yaka NOC yong ka JHADC wow pyrchah ya kitai ki Coke Plant. Khaddooh ka seiñ da kyrpaad ko yaki paidbah wa ya kiwa yahkhmat chnong wa ym toh u e NOC kulmar ya kylla ko chei tim ha ki wow wan.
