Jowai: Ka Narpuh Border Area Joint Action Committee (NBAJAC) da e dorkhat ko ha u Sniawbhalang Dhar uwa man kam u montri wa pait yaka Community and Rural Department yow dawa na oo yaka C&RD Block neibynta ka Narpuh ka wow em ha Lumshnong, EJH.
Ka NBAJAC haka dorkhat da ong ko wa ka thaiñ Narpuh toh kawa em cha kdong ka jylla kawa em khappood waka jylla Assam wa Bangladesh wei na Malidor yow poi cha Khliehriat da jngai 100 Km wei yow poi thaw kiwa chong chnong kiwa sah Huroi, Hingaria wa kiwi kiwi man ko kawa chitom bha neidaw wa joor ware i sih u sarok khamtam ha ki por slap wei ka yungkrehkaam ka C&RD Block wa em ha Khliehriat katni ym man ko kawa yarap ya ki paidbah kani ka thaaiñ khamtam wow yoh yaki Scheme kam ka MGNREGS neidaw wa da jngai ware wei wa sih ki sarok.
Chooh chooh da ong wa katkam ka Census u snem 2011, ki chnong wa em hapoh ka thaaiñ Lumshnong da em ki 55 tylli wei i boonbru da poi ko 45,984 ngut heiwa 90% naki toh ki warep wei man ko kawa chitom wow poi cha ki yung krehkaam ka sorkar wa jngai ki na ki chnong yong ki.
Yow poi du ha Khliehriat kiwa chnong chnong kani ka thaaiñ kiwa em cha kdong cha chmiang da hap ki wow pyllut T. 1,500 iwa man ka poisa wa emkaam wow im ki chi tayaw iwa ktah bha ya ki yow ye ki u pyndep yei kaam yong ki.
Ka Committee da pyntip ko leh wa nadooh u snem 1996-1997 da sdang ka yakhih yow yoh yaka C&RD Block ha Lumshnong kawa yahkhmat daka All Narpuh Students’ Association, tangwa hadooh katni ym em wa bna yeini hadien wa da lai boontylli ki sorkar iwa da pynman yaka thaaiñ kawa sahdien ha waroh ki liang.
Chooh chooh da ong wa ka Lumshnong man ko ka thaw wa biang dooh wow booh yaka C&RD Block, neidaw wa em ko hapyrdi kawa suk kiwi ki chnong wow poi wei lada kheiñ nadooh na Malidor hadooh Lumshnong da em ko kamwa 50-60 Km iwa man i jooh yaki chnong kamka Huroi, Hingaria wa kiwi.
Ka Committee da pyntip ko leh waka chnong da bait ko wow e thaw cha ka sorkar yow chna yaka yung krehkaam wei biang leh ka um wa kiwi kiwi kiwa emkaam.
Discussion about this post