Ynne ka sngi, ki khynroo khyllood wa lai puræ ha North Eastern Hills University (NEHU) da lai toor ki khrui cha kamra u Vice Chancellor, u Prof. Prabha Shankar Shukla yow dawa pyndam kreh noh ya u Nantu Das uwa man u Assistant Registrar (Security) wei uwa pait leh kam u Asst. Sports Director heiwa da chah pynbaad u wa jrong kti u ya kawi ka kynthai wa lai puræ.
Kini kiwa lai puræ da khang tala ki leh ya ka kamra kreh yong uni u bru.
Da lai ujor FIR leh pyrchah ya uni u bru hajrong ini jrong kti u ya kani ka kynthai wei da kyntu leh ya ki pulit wow pynsmat u kem ya oo. Kini kiwa lai puræ da pynchlur ki leh ya kiwi wa maad kam ini i jait wa toh u wan ki chakhmat heiwa ka NEHU Student’s Union daw yarap ko ya ki.
Neiliang u VC da kular u wow bichaar bniah ya ini i dawa ka NEHUSU wei daw e u yei rai hapoh kani ki le sngi hajrong ini i dawa wow pyndam kreh ya uni u bru.
Chwa wow lai psiah cha ka kamra u VC wei da khang tala leh ya ka kamra u Nantu, kiwa lai puræ da ya kbai ki wei da em leh i pynyoo nia wa u VC tangwa hadien da kular u wow pait yei dawa katkam ki kyndon.
Heijooh i por, ka Khasi Students Union (KSU) NEHU Unit da ujor ko cha u Vice Chancellor wow pyndam kreh ya u Nantu Das kam u Assistant Director ka Sports yong ka skurbah NEHU.
Hawa klam wa kiwa thoh khubor hadien i yachem ya u VC, u Prof P Shukla, neiliang u General Secretary ka KSU NEHU Unit, u Rudolf Chyne da ong u wa i lai yachem yong ki ya u VC toh yow ujor hajrong iwa jia iwa da jia haka 19 tarik heiwa kawi ka kynthai da chah thombor ko ha u Nantu Das.
Neiliang yong u Vice Chancellor, da paan por u hapoh ka chisngi arsngi yow chim ya ka rai wow pyndam kreh noh, da pyntip u General Secretary ka KSU NEHU Unit.
“I dawa i wa toh u pyndam kreh noh ya u Natu Das na waroh ki kaam wa ksoh u kat wym pu pyndep yaka takit,” da ong u Chyne.
Katkam i khana u General Secretary ka KSU NEHU Unit, “Uni u Nantu Das da lai choo u ya kani ka kynthai na Umshyrpi wei da sdang u wow jrong kti ka hapoh kari wei manda poi ha Kiang Nangbah Guest House NEHU da sdang biang uw wow jrong kti wei neiliang kani ka kynthai da ya ksaaid ko wei deiwa emlang u Blai da lait ko nei chah thombor ha uni u baar jylla.”
“Hawa yatoh wa ini, neiliang kiwa ha-yung ha-sem yong kani ka kynthai da lai ki wow ujor FIR ha Mawlai Mawkynroh Police Outpost pyrchah ya uni u Nantu Das,” da pyntip u Chyne.
Chooh chooh katkam wa khana u General Secretary wa ya u Nantu Das da chah kem nadooh ynnin i janmiet ha ki pulit wei katni dang em u hapyrdi i chah takit.
Hajrong ini wa jia, neiliang ka seiñ da beiñ joor ko yeini wa leh uni u baar jylla uwa da tba kti ya ka kynthai wei da maham ki leh ya ki bor pynlai ka NEHU wa lada ym leh ki iyi iyi hajrong ini wa jia, ym yohsa ki wow chim noh da kiwi de ki laad ki luti.
Discussion about this post