Ka National People’s Youth Front (NPYF) kawa man kam ka chnat khynroo ka NPP da dawa ko na ka sorkar wow phah takit bniah wei pynchitom katkam ka aiñ ya kiwa emkti hei jia tyrrah kari iwa da wanrah yei dooh noh yei mynsien yong uwi u khynroo wa lai luti cha ka Cherry Blossom Festival 2024.
U President ka NPYF, u Kitborlang Nongrem da pynsñiaw u yei sñiawsih hawa yatoh wa ini wa jia, heiwa da dawa u na ka sorkar wow pynchitom ya ki bru kiwa emkti, khamtam hadien wa da chah pynbaad wa ini da jia i hapyrdi ka kari wa synraan ya ka kari VIP u Montri sorkar.
Da ong wa kamwa jooh yaklam wa ym em uwa em haneiñ yong ka aiñ, wei neiliang ka NPYF da dawa bait wow phah takit wei lada chem ya uwon uwon wa emkti toh u chim bait katkam ka aiñ.
Neiliang u Nongrem da phah u leh yei sñiawlem cha kiwa ha-yung ha-sem u khynroo wa da khlaad noh.
Kam wow pynkynmoo wa ha ka 15 tarik, uwi u khynroo wa pyrtuid u Hudderfield Rymbui (30 snem), da khlaad noh u ha luti katwa dang lai cha ka tamasa Cherry Blossom, wei da ong wa ini i khlaad u toh nei ya tyrrah wa ka kari wa synraan VIP, heiwa da chah pynbaad leh wa kani ka kari da lai bait ko wot hadien itai i jia ha u sarok Shillong Bypass.
Discussion about this post