Ka seiñ NSUI da beiñ joor wei dawa pynchitom ko deiwa eh ya ki damok wa emkti tynyap ya kawi ka khynnah kynthai kawa puræ Class 10 kawa na Pamrakmai, East Jaiñtia Hills District wei kamjooh yeiwa chah noh beiñ iwi i khonboo kynthai ha yung krehkam u Commandant ka Home Guard, Ladthadlaboh, Jowai.
Ka seiñ da ong ko wa ini i jia ma jia kini ki kaam da wanrah ko yei tieñ wei chongsier ya ki khynnah skur, khynnah kynthai wei kamjooh ya ka imlang ka sahlang.
Da ong leh wa ini i jia da sdang ko wow ku hapoh ki District neidaw wym em chimkhia wei tlot i bor ka aiñ wow thooh ya ki damok kiwa tynyap leh ya kawi ka khynnah skur yong ka Tia Chaphrang Higher Secondary School, Sohkymphor iwa da jia ynnin u snem wei ini da pynman ko wow e mynsien wei pynchlur ya ki damok wow pynjoor ya ki kaam pyrchah aiñ.
Neiliang ka seiñ da dap ko dei mynsien wa sñiawsih wow yoo neipor cheipor yei kam kini ki jia i wym kheiñkor yei mynsien bru kamjooh ya ki khynnah kynthai iwa da pyndooh burom yaka ri-loom Jaiñtia kamjooh ya ka jylla nalor ka jylla iong i man ko kawi na ki jylla kawa emburom ha ka riti ka dustur wei kamjoh kawa tip kam ka Matrilineal Society.
Neiliang ka seiñ da kyntu wei kyrpaad joor ko ya ka aiñ wow chimkhia ko wei kamjooh wym ym hoi u kheiñstiñ ya ini i kaam deiwa krehchitom wow thooh hawa chem ya kini ki damok wei wow pynchitom deiwa eh khnang yow chngaaiñ wei chongsuk ka imlang sahlang.
Ka khubor lyngba u State General Secretary In-charge Jaiñtia Hills Unit, u Lalrinzuala Thieite wei kamjooh na u State President, u Bansharai Pyngrope ka NSUI.
