Jowai: Ka seiñ All Hynñiewtrep People United Front (AHPUF) hadien wa da wan e dorkhat ko ha u DC ka West Jaiñtia u R. Rapthap ha kani ka 17 tarik wow kyrpad pynkhooid pynjngiar wei u chna yeiwa da jæd wa pra ka Nan Kasari kamjooh leh ka Tpep Thang Sati ka kur Dkhar wa em hajan ka yungkrehkaam u DC, ynne ka sngi nawon hei yaklam wa kiwa pathai khubor da ong ki wa dap ki dei mynsien wa sñiawkhia wow yoo wa kani ka nan wa em ko hapyrdi ka chnong Jowai dap ko du i tngit wa yoo kynchiñ wow pait.
U General Secretary ka seiñ u Chandametre Sungoh da ong u wa lada sah kani ka nan kamni man i ma wa khroo ya ki bru wa chong wasah hajan yong ka.
Kamtæ lada ki tnat wa toh u pait ye ki u pynkhooid u pynjgiar ya ka kamjooh ya ki soodong sookun wei natlor wow psan ya ki dakha daw tikna u riñ ko ya ki bru u kayit ki u hiar paitke ha kani ka Park seiwi wa em ko harood sarok.
Neitæ ong u nyngkong da booh i dawa wow pynkhooid yei jakhlia hapoh ka nan neibhah da dap ko du ki jhep ki klong ki sdær wa pær, wei wow booh ki kyndon kdoh ya kiwa noh taroi yei jhep, wow chna yeiwa da oor i kynroh, wei wow yada nei kai ki um jakhlia na ka Margret Bar Memorial Girls Hostel wa na ki dukan ka Seiñraij wa em ha Stand War, neibhah katkam i pait i sylli yong ki ong ki wa i jakhlia da kai bait ki chapoh kani ka nan.
Discussion about this post