Ki Speed Breaker kiwa dang pyndait thymme nadooh na Jowai hadooh wa poi cha Mihmyntdu da nang boon ki kat dang mih ki sngi heiwa katni da sdang ki wow em nadooh na jan Marian Hill Higher Secondary kiwa dapoi waroh 11 tylli hadooh ha Mihmyntdu.
Ini da ktah ko chiboon yei lai i wan ki kari neidaw wa joor wa hap u lai suki wa em kini ki Speed Breaker wei da hap wow pynlutpor ar chah le chah wa joor sahkut kari wei da chimpor hadooh chi kynta du na Jowai cha Mihmyntdu.
Hajrong ini, neiliang ka seiñ kiwa kamai Taxi, ka West Jaiñtia Hills Taxi Owner & Driver Association (WJHTODA) hadien wa da chah ktah joor i kamai ki neidaw wa em kini ki Speed Breaker kamjooh ki khynnah skur kiwa da chem chitom wow yoh kari manda wai skur ki, da lai ujor ki ha u DC ka West Jaiñtia Hills ynne ka sngi yow dawa looid noh ya kini ki Speed Breaker.
Ka seiñ da ong ko ha u DC wa ki kam kiwa kamai kari da chah ktah ki cha palat nadooh wa em kini ki Speed Breaker heiwa da hiar i kamai da mar chiteiñ du nei lut i por hei sahkut kari.
Hei yaklam ka seiñ wa u DC, da kular u wa daw kyrriah ya kini ki Speed Breaker tangwa ym toh waroh chisiendon wei daw pait chwa ya kiwon u looid nyngkong.
Kiwa kamai kari da ong ki leh wa ini da ktah ko ya kiwa lai kreh neibhah da eh wow poi ki heipor wa biang wei da man ko i dooh nong ya waroh, kamtæ da kyntu ya u DC wow leh yeiwa emkaam khang yow pynsuk ya kiwa boon wa lang.
