Shillong: Ka Synjuk Ki Nongsynshar Shnong Ka Nongthymmai Pyllun da lai ki wow dawa na u montri rangbah, u Conrad K Sangma wow kylla (Amend) noh ya i rukom e Scheduled Tribes/Castes Certificate kawa man katkam ka Presidential Order 1950 ka sorkar pyrdi deiwa pyndam noh ya ki bru ri-loom ki wym toh na ka jylla Meghalaya.
Ynne ka sngi kiwa yahkhmat ka synjuk da yahcem ki ya u montri rangbah wei da e kti leh ya ka dorkhat neibynta ini dawa yong ki.
Hawa yaklam wa ki laad pathai khubor, u President ka synjuk, u Bantylli Nari da ong u wa emkaam jhan wow pait biang ya kani ka Presidential Order (Scheduled tribe) 1950 neidaw ha ka thup ki Schedule Tribes wa tipmit da ka jylla Assam da pynbood lang kamjooh da ka jylla Meghalaya nadooh wa yoh ya ka jylla kattu la 46 snem.
Da ong u wa kiwi ki jylla ha ka thaaiñ mihsngi ha ki por wa ki yoh jylla ki da pyntip ki cha ka sorkar pyrdi wow kylla noh ya katai ka Presidential Order, tangwa ha jylla Meghalaya ym em leh ya ini.
Da ong u leh wa em kamwa 17 tylli ki jait bru ri-loom katkam ka Presidential Order 1950 wa kynthup ya ki Kuki, kiwa em 37 tylli ki Sub-Tribe, wei i rukom bood yong ka jylla Meghalaya da pynkulmar ko ya i rukom tipmit ya ki bru ri-loom ha kani ka jylla neidaw wa em ki bru ri-loom wa wan na kiwi ki jylla ki yoh ki ya i jooh i tipmit wa i myntoi kam ki tre jylla wei da yoh ki leh u man kam ki tre thaw waka khayi pateiñ, kamtæ kiwi ki bru ri-loom ym toh u yoh ki ya kani ka hok.
“Kini ki bru ri-loom na kiwi ki jylla ym emkaam ki leh yaka Trading License na ka Khasi Hills Autonomous District Council, katwa ki bru ri-loom na Meghalaya lada ki lai kreh ki næ sah cha kiwi won ki thaw ha ka thaain ym chah kynthup lang ki kam ki bru ri-loom,” da ong biang u Nari.
U Nari da kdaw u leh wa katkam wa pynmih hukum ka Supreme Court ha ka 30 tarik Naisaphra (Aug) 2018 da phah wa uwon uwon u bru wa em na ka thup Schedule Caste wa Schedule Tribe ha kawi ka jylla ym chah wow kam næ yoh yei tipmit kam ki bru ri-loom ha kiwei won ki jylla wa ki lai sah lai kreh ki næ lai puræ.
U Nari da pyntip u leh wa neiliang u Conrad da kular u wow chimkhia hajrong ini i dawa yong ka synjuk wei daw khut yaklam biang ya ki na kani ka bynta.
“I kwah i wa kiwi won ki bru ri-loom ki wym toh na kani ka jylla wow pyndam noh ki yei tipmit ya ki kam ki bru ri-loom wei ym toh u yoh ki i hok kamwa yoh i kamwa ym yoh i ha ki jylla yong ki,” da ong uwa yahkhmat ka synjuk.
Discussion about this post