Ka Thma U Rangli Juki (TUR) da beiñ joor ko ya iwa jia wa sñiawsih heiwa ki bru da mynsoo ki ha ka Public Hearing neibynta ka Star Cement kawa da pynman ha Khliehriat, East Jaiñtia Hills, deiwa ong wa ini toh i pyrchang yabor wow pynman ya ka Public Hearing neibynta ki karkhana pynmih khyndaw bilat kiwa da baam lut ya i spah rymaw ha ka thaaiñ Jaintia Hills.
Ka TUR da ong ko wa ki karkhana yong ki bru samen da yoh psiah ki cha ka jylla yong i nadooh wa ka sorkar jylla da wai ko ya ka khyrdop bah lyngba ka Policy thymme kawa tip kam ka Single Window Agency kawa da sdang krehkaam nadooh u snem 1992.
Ka Single Window Agency Policy toh chibynta ka Economic Liberalisation kawa ka sorkar India da pdiang pura ko nadooh ka snem 1990 wei kani ka Economic Policy da wai laad ya kiwa khayi yong samen kam ki Company wow thombor hajrong ka rymaw wei wow yoohroit ya i hok yong ki tre ri tre muluk kam ha ka jylla Meghalaya.
Ka TUR da pyrchah joor ko ya i pyrchang yong ka Star Cement Company wow khurup chooh chooh ki thaw sa kamwa 45 Hectare i khyndaw wow tih ya u moochuni. Wei ini i thaw wa kwah ki wow khurup yabor toh leh ka thaw wa ka khloo Narpuh iwa daw booh hei maa ya ki mrad, ki syntu, ki wah wa heh wa kiwa khian.
Ka TUR da dawa ko wow pynsangeh noh chisyndon ya ka Public Hearing wei wow pyndam noh ya kiwon kiwon ki soskular hapyrdi kiwa chong chnong ka Brichyrnot wa ka Star Cement.
Ka TUR da dawa ko leh na ka JHADC wow pyndam noh ya kiwon kiwon ki NOC næ ki Certificate thymme wa da e cha ka STAR Cement.
Ka TUR dawa ko wa toh u pynman yaka kynja Audit wa kyrpang wa kawa laitlooid hajrong ki karkhana pynmih khyndaw bilat kiwa em ha ka jylla waroh kawi.
Ka TUR da dawa ko leh wow sangeh noh ya i e License wow tih wow chalan moochuni ha waroh kawi ka jylla wei wa ka chnat Environment & Forest toh u pynman ko yaka sylli wei wow pynman yaka takit waka Audit hajrong wa tih ya ki mar pohkhyndaw wa kynthup ya u moochuni.
Ka TUR da dawa ko wa ka sorkar toh u khut ko da ka Special Session yong ka Legislative Assembly wa i mang kyrpang yaka poisa neibynta wow pynku yaka rep ka riang wa kiwi ki laad e kaam.
Ka TUR da dawa ko leh na ka sorkar wow e sumaar ya kiwa mynsoo wei da pynsñiaw ko leh yei sñiawkhia wa wot ki pulit langrut kiwa lui lui da man ki kam langknia yong ki heh spah kiwa wan wow kjit wow pynjæd yaka spah rymaw.
