Ka TUR da pynsñiaw ko yei yoh kyrmen wei yoh mynsien na ka yung bichaar hawa da rai pynrem hajrong kawi na kiwa boon ki kaam damok u Nidamon Chulet, uwa da leh ya ki kaam pyntieñ wei pynyap bru ha kini ki 15 snem wa da lai.
“I kyrmen i leh wa ka sorkar MDA daw chim ki ya ka luti wow pyndam noh ya oo na ki kaam wa ksoh u ha ki jylli synchaar wei wow sangeh noh chi syndon wow chim Donation na oo lane na ka kynhun yong oo wa na kiwi ki bru wa sih,” da ong ka Tur.
Da kylli leh wa kammon u chah wa ki bru kam u Nidamon Chulet uwa da chah rai pynrem ha i kaam pynyap bru wa u Thomas Sangma uwa da chah pynbaad wa emkti ha i kaam slaitbor ya ka kynthai wow ksoh ki ya ki kaam synchaar ha ka jylla? U Nidamon Chulet toh uwa da chah pynbaad wa emkti ha ki kaam pyntieñ kiwa boon wa kynthup yei bom i dat dusmon ya ka Agnes Kharshiing. Wei iwa sñiawsih won wa ka ki bor sorkar da pyrchang ki wow pynslem wei wow pynwiar ya ki takit.
Ka Tur da ong ko leh man iwa phylla wei yoo sarom chiboon wa ha kini ki kajiak sngi ka NPP da pynksan pathan ko yei man Working President ka East Jaiñtia Hills NPP yong u Nidamon Chulet wei i chah jied yong u Thomas Sangma kam u National General Secretary ka NPP.
Ka Tur da pynkynmoo ko ya kiwa yahkhmat ka NPP wa ym toh de u pyntieñ ya i sur yong kiwa pynbaad wa kiwa wan chakhmat wow kylli kam ka Amita Sangma kawa katni dang yakhun wei ya ksaaid wow yoh ka bichaar hok neibynta idæ wa ya ka Agnes iwa da neh kattu la soo snem.
Ka TUR ka ngait ko wa kiwa chong chnong u em ki yei hok wow klam yei sakhiat yow pteiñ u chna rynsan hei wow yoh ki bru ka laad wow klam wei pynsñiaw yei sakhiat.
Da kyntu joor ya kiwa synchaar wow chim ya kani ka laad wow pynbait yei duna wa em ha ka synchaar khadar wa hawa bichaar. Neibhah ka bichaar leh teiñ teiñ ye ko wow tlot neibhah hadooh hadien 10 snem wa u Nidamon Chulet da chah rai pynrem u hajrong ki kaam damok pynyap bru wa da leh u. Hapoh kini ki snem da yoh u lai wei yohlaad u wow leh sa kiwi won ki kaam pyntieñ ha thaaiñ Jaintia Hills, da ong ka Tur.
Kamtæ da kyrmen wa u Thomas Sangma wym yohlaad u wow lehmon kam u Nidamon Chulet, wei na ini i daw da dawa wa toh u pyndam noh chisyndon ya oo na ki kaam kiwa ksoh u ha ki kaam saiñhima khnang wa ym embor u wow pyntieñ ya ki bru wa khamtam ya kiwa chah slaitbor.
