Ka Thma U Rangli Juki (TUR) da thoh ko cha u Montri Rangbah ka jylla u Conrad Sangma yow pynyoh yaki dkhot wa thymme kamjooh ka Chairperson ka Meghalaya State Women’s Commission (MSWC) deiwa ong wa ka Commission toh ka wym krehkaam nadooh u Naichiphaw u 2020 nadooh wa kut ka samoi krehkaam. Wei ini da ktah ko ya kitu kiwa wan chakhmat yow paan yarap yow yoh yei hok yong ki nadooh ki kynthai wa chah lehbeiñ, kiwa chah iehbeiñ, kiwa chah pyndooh yei yarap wa kiwi kiwi.
Ka TUR da ong ko wa hanla ka jylla toh kawa chim kur naka kynthai tangwa da man ko kawa boon bha ki kaam thombor yaki kynthai haka thaaiñ, kamjooh i yap ki kynthai wa dang dep kha khon kamjooh i pun khon ki kynthai wa dang khian rta.
Kamtæ da ong wa ini waroh pynyoo ko wa em chiboon ki kaam wa hap wow leh yow yada yei hok ki kynthai, i chait i khiah yong ki wa kiwi de.
Da ong leh wa ka MSWC toh kawa pait da kawi na ki aiñ wa biang dooh hapoh ka ri iwa da wanrah deiwa yakhih ki khynthai hapoh ka jylla wei ini mut wa man ko kawa biang bor wow leh yeiwa emkaam deiwa khooid wei man ko leh ka Commission kawa laitlooid.
Hajrong ini da dawa naka sorkar wow thung ko daka Search and Selection Committee yow pynthymme yaki dkhot ka Commission kiwa ye u yieñ neibynta i hok ki kynthai ka jylla.
Ya ini jooh leh da phah cha uwa yahkhmat ka liang pyrchah u Dr. Mukul Sangma.
