Ka United Hynñiewtrep Movement-East Jaintia Hills District (UHM-EJHD) ha ka kyrwoh khubor wa da pynlait da u President yong ka, u Brosenly Siangshai, ka seiñ da dawa joor ko na ka sorkar Meghalaya wow tuklar smat hajrong i sih palat yong u sarok National Highway-6 ha waroh tymbud luti nadooh Soomer, West Jaiñtia Hills District hadooh Malidor, East Jaiñtia Hills District.
“U sarok NH-6 toh u thied snaam yong ka jylla Meghalaya wei kamjooh leh yong kiwi tawon ki jylla wa em cha khlieh liang sepsngi yong ka ri India wei uni u sarok toh uwa da sih bha sakhiat hadooh kattæ kattæ ha waroh chilynter, khamtam ha ki thaaiñ Mynkre wei ha Khliehriat. Ha kitai ki bynta, em sadu ki thlu wa ki nan um kiwa khian wa kiwa heh hapyrdi sarok,” ong u Brosenly Siangshai.
“Man ko kawa sñiaw sarom hadooh kattæ kattæ wow khut pyrtuid ya uni u sarok kam utæ u sarok National Highway yong ka ri India neibhah i pyrtuid yong oo wa i man i long yong oo ym yahaap cheiwon cheiwon leh. Man u u sarok National Highway du hei naam donhi, ym toh hei kaam”, ong ka kyrwoh na ka seiñ.
Ini i sih palat pood yong uni u sarok da booh ko hei eh yei lai yei wan yong ki paidbah lyngba yong uni u sarok hadooh kattæ kattæ. Ha kiwa boon ki khep, neidaw wa sih ware uni u sarok, da wanrah u yei sih kari nadooh ki khian hadooh ki heh hapyrdi sarok. Wei manda jia kam ini, jooh wanrah ko yei sahkut kari namo i hap lai bait lyngba yong kitai ki thlu ki krem ki nan um kiwa em hapyrdi sarok kiwa da booh ya ki bru wei ya ki kari hei maa nei haap i oor wei mynsoo.
Ka seiñ da ong chooh chooh ko, “Lada kamni bait u ieh yei maan yei long yong uni u sarok khlem pait khlem sumaar, daw poi i por wa uni u sarok u tkut syndet noh u hei lai hei wan, wei manda jia kaini i jia, daw wanrah ko yei eh i khoo iwa khroo hadooh kattæ kattæ ya u paidbah yong ka jylla Meghalaya wei kamjooh leh ya kiwa wan na kiwi ki jylla ka ri.”
Katwa kamtæ, ka seiñ UHM-East Jaiñtia Hills District, neibyntai i bha i miat yong u paidbah, dawa joor ko na u Montri Rangbah ka Meghalaya, u Conrad K Sangma, wei kamjooh leh na ki ar ngut kiwa yahkhmat yong ka East Jaintia Hills District, kitæ u Kyrmen Shylla, MLA 6-Khliehriat Constituency, uwa man leh kam u Montri sorkar jylla wa ya ka Santa Mary Shylla, MLA 5-Sutnga Saipung Constituency wow chimkhia bha ki heiwa u tuklar hajrong i man i long i wym yoosuk yong uni u sarok NH-6.
Discussion about this post