Ka Voice of the People Party (VPP) da ujor ko cha u Commissioner & Secretary ka chnat puræ puthi ka jylla, u Vijay Mantri, hajrong i eh yong kiwa sikai wa kynthup yei wym yoh ya ka Death cum Retirement Gratuity (DCRG) neibynta kiwa sikai kiwa da chong-ngiah nei kaam neibhah ka sorkar wym em da pynlait ryntih ko hadooh katni.
Katkam wa toh u man, kiwa sikai hadien wa da chong-ngiah næ khlaad noh ki chiteiñ por, daw yoh ya ini i su iwa chisien na ka sorkar kawa Rs. 10 lak tangwa em won ki wym em yoh wei da em leh ki kattu katni kiwa da yoh wei ini pynyoo ko yei leh chiliang ka sorkar.
Hawa klam wa kiwa thoh khubor, u MLA ka Mawlai, u Brightstarwell Marbaniang da ong u wa ka sorkar toh u pynlait ryntih ko ya waroh kiwa da chong-ngiah.
Da ong u wa iwi iwa yaphær toh i rukom su tulop neibhah wa kiwa sikai ha ki College hawa psiah ki ha ki kaam wow hikai toh u yoh ki katkam ka University Grant Commission (UGC) Pay Scale tangwa iwa phylla toh wa ka sorkar su ko da ka State Pay Scale.
Heijooh i por, da ong wa ka seiñ da dawa ko leh wow pynku namo wow e Increment ya kiwa da pyndep yei puræ PhD.
Iwi won i dawa ka VPP toh wow pyndam noh yei booh kyndon yei rta psiah kaam kiwa sikai ha ki College. U Brightstarwell da ong u wa katkam ka UGC Norm, ym em kam itæ i booh rta yei kaam Assistant Professor ha ki College.
Ka VPP da pynsñiaw ko leh wa toh u pynsmat wow e yei pynskem ya kiwa da psiah kreh neibhah da em kiwa sikai la le snem leh ym pu pynskem hadooh kattæ. Wei kawi won ka phang wa ka seiñ da rah ko toh wow pynsmat wow pynlait noh ya ka Arrear yong kiwa sikai.
Ka Party da pyrchah ko leh yei rukom pynlai ya ka Exam ki Assistant Professor ha ka Physical Education, neibhah wa da sñiaw lyngngoh wa ka DHTE da khut ko wow pynlai da ka chnat yalehke, iwa man pyrchah ya ka kyndon ka UGC kawa da booh ya kiwa pynlai wa toh u man ki ki stat na ka NEHU næ na ki skurbah.
Discussion about this post