Ka War Jaiñtia Students’ Union (WJSU) ynnin ka sngi da lai booh ujor ko ha ki artylli ki chnat krehkaam sorkar wa kynthup ha MePDCL, Jowai wa haka chnat PWD(R), Jowai South Division, Jowai neibynta u pynsñiaw yei eh i saja wa da maad ka thaaiñ Amlarem heiyatoh waka chnat bordiñ wei kamjooh lyngba ka chnat PWD neiwa jæd palat pood kawi ka yingkieñ lai kari ha u sarok Muktapur-Borghat kawa em haka thaaiñ khappood waka ri Bangladesh.
Lyngba i ujor cha ka chnat saam bordiñ wa da e kti ha u Executive Engineer ka MePDCL, ka WJSU ong ko wa i dooh bordiñ wa khak khak haka thaaiñ iwa jooh neh da ki phaw kynta næ da ki sngi khamtam manda poi i por lyiur da ktah joor bha i yaki paidbah ka thaaiñ.
Sñiaw phylla haroh ki yei leh ka MePDCL neibhah wa ini jia i man-i-por, wei mar ya slap leh da pyndooh bordiñ, wot ha wym em iwon iwon i pynthut ka ramaw yaki chrot bordiñ næ ki sainar bordiñ.
Da ong haroh wa ini da pynartatien yaki paidbah ka thaaiñ kiwa da booh yukylli wa la kani ka chnat pynpoi bordiñ ko haka thaaiñ deiwa pynemkaam da ki tiar wa da kut por mo?
Kamtæ neiliang ka seiñ kyntu joor ko yaka MePDCL wow pynbiang bordiñ lym kamtæ daw chim ko da kiwi won ki luti khnang wa ki paaid ka thaaiñ u yoh myntoi ko kamwa yohlang kiwi ki bynta ka jylla, neibhah wot hapyrdi i pyndooh bordiñ wa khak khak leh i su bordiñ won nang ku ar chah le chah.
Heiyatoh won wa i jæd palatpood ka yingkieñ lai kari ha u sarok Muktapur-Borghat, ka seiñ lyngba i thoh wa da e kti ha u Executive Engineer ka PWD(R), Jowai South Division da kyntu ko yaka chnat krehkaam wow chimkhia neibhah wa booh ko hei maa ya kiwa lai wa wan kiwa pynemkaam u lai lyngba kani ka yingkieñ.
Ya kini ki ujor da phah leh cha u MLA ka thaaiñ, cha u Montri ka chnat PWD wei da dawa na u Executive Engineer wow pynchna smat yaka yingkieñ hapoh chitayaaw nadooh ka tarik wa da yoh pdiang yaka ujor, lym kamtæ ka seiñ kawa em i bahkhlieh yaka thaaiñ ym yohsa ko u leh dei kaam wa khor neibynta u pynmankaam yei emkaam u paidbah.
Discussion about this post