Dei sñiawkhia hadien wa da dooh noh chiboon ki thaw ka Raid ka Hima cha ka jylla Assam ha i pynbait pood wa dadep soi ya ka sorkular MoU da ki ar ngut ki Montri Rangbah yong ka jylla Assam wa Meghalaya ha nongbah Delhi, neiliang ki 3 hima wa kynthup ya ka Hima Mylliem, Jirang wa Nongspung da yachem lang ki dei sñiawkhia.
Ini i yachem toh neidaw wa da dooh noh chiboon ki thaw cha ka Assam, heijooh i por da wanrah i yei chrai ki paidbah hajrong i rai ka sorkar jylla wow e thaw khlem klam che wa ki Syiem, ka District Council wa kamjooh leh wa kiwa synchaar chnong kiwa rap tip bha ya u pood u ang chwa wow soi ya ka MoU wa ka jylla Assam.
Ha ini i yachem da emlang u Syiem ka Hima Jirang, u R. H. Wahlang, Secretary ka Hima Nongspung u E. Mawlong, u Basan Nongkseh ka Hima Mylliem, u Nathaniel Thangkhiew, u Syiem ka Raid Marwet u Ken Syiem, ki muktiar ka High Court, u Erwin Sutnga wa u I. S. Teron, u Chief Adviser ka Amri Karbi National Council, u Desh Demoria deilang wa ki Waheh Chnong wa ki seiñbhalang waphær waphær ka Ri-Bhoi District.
Ha ka yalang da chim ya ka rai wow thoh cha u Montri Rangbah wow pynkylla wut-wut ya ka MoU kawa da dep soi wa ka sorkar Assam, neibhah daw ktah ko chiboon ya i long i man ki paaid wa chong chnong ha khappood wa i dooh noh ya kini ki thaw khamtam kiwa jooh e khih ya ka chnong ka thaw wa kynthup ya ka Dreamland Amusement Park kawa em ha Khanapara, ka nan dahkha ha Maikhuli wa kiwi kiwi.
Hawa yaklam wa uwi na ki tre thaw wa ka sorkar Assam da chna ko ya ka Transit Camp ha Khanapara, da pynsñiaw u yei sñiawsih hajrong i rai ka sorkar jylla hanla chna ya kani ka thaw kawa dang em ha Supreme Court, da man pathan kamwa chah knieh yabor noh i wei da e cha ka Assam khlem iwon won i tip næ pynbait wa ki tre thaw.
