Kiwa chong chnong ka Hingaria, Huroi, Lahalein wa Lejri da pynsñiaw ki yei ktah u sarok Rymbai-Bataw-Borkhat-Sonapur uwa da sih hadooh kattæ yaki nadooh i khih i khan yong ki 5000 tam kiwa chong chnong nalor wym biang ka Mobile Network, ki thaw sumaar iwa da pyntkoh yeiwa im ki bru hadooh wa ki paidbah da thooh yarap ki naka sorkar Bangladesh yow yarap ya kini ki chnong khappood.
Hawa ka pyrthai wakroh kawi da maad ko yaka Lockdown, kini ki chnong da maad ki ya ini nadooh wa sdang ki wow mih kiwa da chah ah naka pyrthai hadooh wa ym em wa tip yi wa jia cha kani ka thaaiñ.
Kiwa yap heipor wa kit yaki cha ki thaw sumaar leh da em neidaw wym poi cha ki thaw sumaar heipor, kiwa kaap cha chilliang pood leh da em yow yoh sumaar ha Bangladesh. Ki warep hap pynlut ki chiboon du wow kit yaki mar yong ki cha ki yaw wei manda dai won ym ye dor deiwa yoh nong.
Yow yoh ya u sarok wa bha wa miat, da dep thoh cha waroh ki heh sorkar nadooh ki Deputy Commissioner, Chief Minister wa Governor kiwa da e du i kular donhi. Da dep thoh leh cha ka PMO, Home Ministry, NITI Aayog, Finance Ministry, NEC wa kiwi kiwi ki yung krehkaam ka sorkar pyrdi yow tuklar ka sorkar pyrdi tangwa ki leh ym em bna ki.
Ya kani ka kaam da poi leh chadooh ka High Court ka Meghalaya waka NHRC, tangwa ki sorkar ha waroh ar ki kyrdan ym em chimkhia ki.
Yaka mang poisa wa T. 123 Klur yow chna ya uni u sarok da neh ko waka DoNER nadooh u April 2019, tangwa ha kini ki por ka DoNER ym em de yaklam ko ya kani ka kaam iwa pynman ya kani ka kaam ka wym pu yoh ko yei mynjur hadooh katni.
Kamtæ kiwa chong chnong da pynsñiaw yei chrai ya ini leh bei-nah yaki heiwa tang yaka sarok kawa man i hok wow yoh leh ym ye wow pynyoh yaki iwa da pynmih ya i dooh nong wa waroh i jait du nei wym yoh sarok wei ya kiwa chong chnong da kynmoo yaki du ha i por Election donhi.
Kiwa chong chnong haki yalang wa da pynman ha kini ki sngi da yaklam ki yaki laad ki luti wow chim, wei da rai wa lada ym chimkhia ka sorkar yaki deiwa chna sarok, bha yaka sorkar wow e noh ya kini ki 5000 tam kiwa chong chnong cha ka Bangladesh. Wei da chim leh yaka rai wow thoh cha ka sorkar Bangladesh yow kyrpaad yaka wow chna ko ya u sarok.
Ka kyrwoh na u Kynjaimon Amse uwa man kam uwa e ktien ki 4 chnong, u Raja L Suchen, Secretary ka Huroi wa u Garnes Talang, Secretary ka chnong Hingaria.
