Jowai: Ynne i dawa wow kyrriah ya ka yung krehkaam ka PWD Jowai North Division cha Shangpung dang joor i kat dang lai ki sngi heiwa ynne ka sngi ki 9 tylli ki seiñbhalang da lai yachem ki ya u symbood montri rangbah ka jylla uwa pait leh ya ka chnat PWD (Roads), u Prestone Tynsong deiwa ekti leh ha oo ya ka dorkhat hajrong kani ka kaam.
Kini ki seiñ da ong ki wa ki paidbah ka thaaiñ Shangpung kiwa na ki thaaiñ khappood ka jylla wa ka Assam ha West Jaiñtia Hills kwah ki wow kyrriah noh ya ka yung krehkaam ka PWD Jowai North Division na Jowai cha Shangpung wei ka sorkar leh da pynmih hukum ko hajrong ini ha ka 20 Kmaichonglad 2018.
Da kdaw ki leh wa ha ka jooh ka sngi da pynmih ya ka hukum wow pynkylla yei pyrtuid kani ka yung krehkaam cha ka PWD Shangpung Division.
Ki seiñ da ong ki wa ini waroh da man i iwa sahteiñ hadooh ynne ka sngi.
Da ong ki leh wa da chna ya ka yung krehkaam ka PWD Shangpung Division ha Shangpung kamjooh leh ya ka thaw sah ki wakreh namo ki Quarter.
Wei ini i pynslem wow pynkrehkaam ya kani ka hukum da ktah joor i ya ki paidbah ka thaaiñ khamtam ki paidbah ka Mowkaiaw wa Raliang Constituency neibhah wa da haap lai pyndep kaam ki chadooh cha Jowai.
Heijooh i por da ong ki wa u pood kani ka Division poi u chadooh cha ki chnong wa em ha khappood wa ka Assam kam ka Moolber, Khatkasla, Psiar, Mukroh, Saphai wa kiwi kiwi.
Kamtæ hajrong kini ki yurim da dawa wow kyrriah noh ya kani ka yung krehkaam wei wow pynkylla ya i pyrtuid yong ka katkam ka hukum ka sorkar.
Kini ki 9 tylli ki seiñ kynthup ki ya ka JSM, HANM, HYC, FKJGP, WJNC, HNYF, MPUF, KSU wa ka HNPF.
