Ki artylli ki seiñbhalang kitæ ka KSU-Jaiñtia Hills District Unit waka FKJGP-Jaiñtia Hills District da e dorkhat ki ha u DC ka West Jaiñtia Hills ynne ka sngi hajrong i rukom chim bai lai, bai wan ka NHAI waka Ministry of Road Transport & Highways (MORTH) lyngba ki Toll Plaza heiwa ka Transport Department ka Meghalaya leh da pynkrehkaam ko ya kani ka hukum kawa da pynbna haka 5 tarik uni u bnai.
Neiliang ki ar seiñ da ong ki wa ini i pynbna toh iwa da leh syndet syndet iwa da pynkulmar yaki paidbah heiwa waroh ki kari toh u em ki ya u FASTag, kamtæ da dawa joor wow e por yaki paidbah wow leh ki ya ini.
Da pynsñiaw leh yei wym mynjur yei chim ar chah ya kitu kiwa lai da ki kari wa khlem em FASTag.
Kamtæ da dawa wow booh ya iwi i thaw psiah neibynta kitu kiwa ym pu em FASTag yow su ki kam nachwa ha ki Toll Plaza yow lait ki u su ar chah.
Da dawa chooh chooh wa ki bru ka thaaiñ ym toh u su ki yaka bai lai, bai wan ha ki Toll Plaza wa em ha 7 Mer wa ha Lumshnopng neibhah katkam ki kyndon wa kiwon kiwon ki Toll Plaza kiwa ye u chim poisa toh du hadien wa dep chna ya u sarok Four-Lane kamjooh wow chna yaki dooid rood sarok wa paka wa kiwi kiwi de wei du hadien ini yow yaklam yei su bai lai, bai wan.
