Ki ar tylli ki seiñbhalang kitæ ka Khasi Students’ Union wa ka Federation of Khasi Jaintia & Garo People kiwa napoh ka thaaiñ War Jaiñtia, ha kani ka 19 tarik da lai yachem ki ya u Deputy Commissioner ka West Jaiñtia Hills yow yaklam yei eh wa chem ki chnong wa boon tylli nei pynman Containment Area hapoh War Jaiñtia nadooh ka kut ka 14 tarik uni u bnai.
Ki ar seiñ da dawa ki wa ka sorkar lyngba u DC wow chna laad yow pynman noh da ki Micro Containment neibhah wa chah ktah ki paidbah khamtam kiwa dooh wa duk kiwa ym yoh de wow lai kamai kajih yow pyndap yeiwa emkaam i yung i sem. Da ong leh wa neidaw ya kitu kiwa da Test wei da chem toh kiwa yoh ya u khñiang khlam, da ieh ya ki wow chong kset ki pyn ha yung hi wei ini da booh lang yeiwa eh ya kiwi de.
Da ong leh wa katkam i ong ka sorkar, wa ka Lockdown ym toh de wow pynman tangwa kini ki chnong toh kiwa da chah khang bait sbak khlem da e laad ya ki warep wow lai cha ki thaw rep næ ki bri yong ki.
Da kdaw leh wa ya ka yaw khappood dang e laad wow wai, kamtæ ka sorkar toh u e laad ko kamjooh ya ki paidbah, khamtam kiwa dooh wa da duk wow lai kreh ki deiwa booh kyndon yow yoh kamai lang, ym toh wow leh chilliang khmat.
Heijooh i por ki ar seiñ da kyntu ki ya ki paidbah wym toh u kheiñstiñ ya ini i kaam wei wow bood thij ya ki kyndon ka sorkar.
