Ki dkhot yong ki ar tylli ki seiñbhalang kiwa kynthup ya ka FKJGP-East Jaiñtia Hills District wa ka KSU Khliehriat Circle da pynsñiaw ki yei chrai wa joor hajrong i chah tynyap ka khynnah skur kawa na ka chnong Pamrakmai, East Jaiñtia Hills District kawa lai puræ Class X ha ka Wapung Secondary School heiwa yei metyap yong da chem na khloo Ar Kilo najan i thaw wa tip kam ka Wah Umbluh Wai Khyrwi wa haap hapooh u pood u ang ka Dkhiah East.
Hajrong ini i jia, neiliang ki arseiñ da lai booh ki da i thoh ha u Jagpal Singh Dhanao, IPS Superintendent of Police, East Jaiñtia Hills District yow dawa wow chimkhia kyrpang ya kam kini ki jait jia kiwa da jia man-i-por ya ki khynnah kynthai hapoh ka District.
Ki ar seiñ da pynkynmoo ki leh yei jia wa dang dep jia heiwa da chah slaitbor wei chah tynyap dusmon kawi ka khynnah skur ha chnong Sohkymphor heiwa kiwa emkti ym pu em yoh ki yei bainong wa toh u yoh ki, da ong u S.N. Suchen uwa yalam ka KSU.
Ki ar seiñ ym em yohlaad ki wow yachem ya u SP wei da yaklam ki ya ini i kaam wa u Additional Superintendent of Police, u C. Sangma wow chimkhia pynman Special Investigation ya kam kini ki jia kiwa da jia ma jia, da pyntip u MC Suting, President ka FKJGP.
Ya kani ka ujor da e leh cha u Deputy Commissioner ka District yow dawa wa ki bor District toh u pynman ki yaka takit wa kyrpang yow chemdien ya kiwa emkti wei yow pynchitom ya ki deiwa khor.
