Dawa ki Christan ka Arunachal Pradesh wow pyndam noh ya ka aiñ APFRA

Ki Christan na kylleiñ ka jylla Arunachal Pradesh hapoh ka satri ka Arunachal Christian Forum (ACF), da pynman ki ya yalang pyrchah ynnin ka sngi ha Papum Pare District yow dawa pyndam noh ya ka aiñ Arunachal Pradesh Freedom of Religion Act (APFRA), 1978.

Ka ACF nyngkong da mut ko wow pynman yakhih hakhmat ka Secretariat ha nongbah Itanagar tangwa ym em e bor ya ki da ka Itanagar Capital Region Administration.

Ynnin kawa man leh ka sngi sdang ka chong dorbar wa nyngkong ka 4th Session ka 8th Legislative Assembly, da mut wow wanrah ya ka Private Member Resolution hajrong kani ka APFRA da u MLA ka Yachuli, u Toko Tatung, tangwa ym chah wow leh yeini. U Tatung da yooluti wa daw wanrah u da ka Special Mention yow e laad ya ki MLA wow yaklam ya ka phang wa emkaam neibynta ki paidbah.

I daw wym e laad ya u Tatung wow wanrah u ya ka Private Member Resolution toh wa ye u wanrah yei kynaad wa sariem wa jai heipor wa pyrchah PRC ha u snem 2019.

Related posts

Ham mylliñ u e khublei ya ki manbei wa em khon chipai wa dang yakhun yada ya ka ri: Wailadmiki Shylla

May 11, 2025

100 ngut ki Terrorist wa 35-40 ngut ki chipai Pakistan wa yap

May 11, 2025

Neiliang u Secretary General ka ACF, u James Techi Tara da ong u wa pyrchah ki ya kani ka aiñ wei da kwah ki wow pyndam pyndooh noh ka waroh kawi.

Ha ka 3 tarik uni u bnai, da khut ya ki dkhot ka ACF yow yaklam neibynta ki Rules wow booh hapoh kani ka aiñ tangwa da ong ki wym kwah ki ka kani ka aiñ wei toh u pyndam ka wei ym em kwah ki wow yaklam chaphang kitæ ki Rules.

Ka AFC da ong ko wa ki aiñ wa sariem kam ka APFRA da yoo wa khanglaad ki yei man laitlooid ki khian paaid u mane Blai ki wei ini i thmu wow pynkhai im ka daw wanrah yei chah paitkhmat chah leh chiliang ki Christan ka Arunachal neibhah ym ye u em ka aiñ kawa leh chiliang ya kiwon kiwon.

Da ong ki wa daw pyrkhat ki wow pynman yakhih yow dawa wanrah ya ka Arunachal Pradesh hapoh ka Article 371A wa ka 6^th Schedule.

Ha kawi won ka liang, kiwa bood ya ki niam tynre ka Arunachal da kwah ki wow pynkrehkaam smat ya kani ka aiñ heiwa ki leh da pynman da ka lai paidbah deiwa ong wa kani ka aiñ wa da wanrah ka ha u snem 1978 neibynta i bha i miat kiwa dang bood ya ka niam tynre tangwa ym em pynkrehkaam ka.

Ka sorkar jylla da ong ko wow pynkrehkaam noh ya kani ka APFRA heiwa ka Gauhati High Court da phah ko wow pynkhreh noh ya ki Rules neibynta u em hapoh kani ka aiñ.

U Chief Minister ka Arunachal, u Pema Khandu da ong u wa kini ki Rules wa da pynkhreh ymtoh deiwa mang ya kawon kawon ka niam.

Kani ka aiñ toh kawa da wanrah nachwa yow yada ya ki niam tynre yow lait ki u chah pynthut ha kiwi ki niam ki bor kiwa na baar tangwa ym em pynkrehkaam ka kani ka aiñ kawa sariem wa ki aiñ wa khang yei chah pynkylla niam dei bor deiwa pynemkaam dei buit.

Ha Arunachal ki jait niam wa boon paaid toh kiwa ngait ya ka Niam Tynre, ki Christan wa ki Buddhist.