Ki 5 tylli ki Dorbar Chnong ka Jaiaw Pyllun wa kynthup ya ka Jaiaw Laitdom, Jaiaw Langsning, Jaiaw Pdeng, Jaiaw Lansonlane waka Jaiaw Shyiap Lumpyllun da thoh ki cha ka DC ka East Khasi Hills District kawa man leh kam ka Member Secretary ka Peace Committee wow dawa na ka sorkar wow pynmih ya ki hukum cha ki pulit ka Meghalaya wym toh u chah ya ki pulit wow psiah lai kynreh cha ki dong ka chnong khlem da pyntip chwa cha ki waheh chnong.
Da ong wa ha kiwa boon ki por, ki pulit manda psiah yabor ki chapoh ki dong da jia wa chah ktah ki thaw ki bhaw, ki yung ki sem kamjooh hadooh wa chah dat kiwa em cha rood cha kiar kiwa lui lui wa kiwi de ki rukom leh ki pulit ki wym yahap. Wei kini waroh toh u sangeh ki chisyndon neidaw wa pynchong sy’ir ko ya ki paidbah.
Da dawa leh wow kyrriah noh ya ka CRPF Camp kawa em hajan ka yingkieñ Mawlai kawa dang haap hapoh u pood u ang ka Dorbar Chnong Jaiaw Laitdom cha i thaw wa jngai na i thaw sah ki bru.
Ki 5 Dorbar Chnong da pynsñiaw ki leh yei sñiawsih yei tympdung bomb IED ha Laitumkhrah wa i chah siat u Cherishsterfield Thangkhiew hapoh i yung wa sah u ha Mawlai Kynton Massar iwa da pynthut biang sa chisien yei chongsuk hapoh Shillong.
Hajrong ini waroh, ki 5 Dorbar Chnong da ong ki wa da sñiawngooh ki yei kynthup lang ya ki hapoh ka Peace Committee tangwa da sñiaw wa daw ye ki wow krehkaam bha lada em ki hapoh ka Peace Committee kawa khian deiwa em du ki dkhot ka Dorbar Chnong Jaiaw Pyllun, Lympung ki Hynriew Dorbar ka Mawkhar wa ka Lympung Shiphew Dorbar ka Lumdiengjri. Wei lada chna ya kani ka Committee daw smat ki wow ya chimbynta lang.
Kamtæ ka Dorbar Chnong Jaiaw Pyllun da kynran ko nei embynta lang ha ka Peace Committee wa da chna da ka Home (Political) Department ka sorkar jylla.
