Ka seiñ ki jaitbru wa khian paaid hapoh ka jylla wa tip kam ka Meghalaya Indigenous Minority Tribes’ Forum (MIMTF) kawa na West Garo Hills hadien wa da pynbna ka sorkar ya ka Committee ka wow emlang waroh ki seiñ saiñpyrthai ki wow yaklam chaphang ka Reservation Policy wa kamjooh leh hajrong ka Roster System wow pynbait khaddooh kammon wow pynkrehkaam ya i rukom bhah kreh sorkar hapoh ka jylla, da dawa ki wow khut lang ya ki wow embynta hapoh kani ka Committee.
Da pyntip ki wa ya kani ka MIMTF da seiñ da ki jaitbru ri-loom wa pura kiwa em hapoh ka Meghalaya kiwa kynthup ya ki Rabha, Boro, Hajong, Koch wa ki Mann wei da seiñ ya kani ka seiñ ha ka 29 tarik uni u bnai.
Kamtæ da ong ki wa ki toh kiwa da chah ieh mylliñ wow pynsñiaw ki yei hok yong ki hajrong ka Reservation Policy waka Roster System wei toh u khut lang leh ya ki wow embynta lang ki ha ka Committee.
Hajrong ini da kyntu ya u Montri Rangbah ka jylla, u Conrad Sangma wow khut lang ya ki yow yoh laad ki wow embynta wow yaklam hajrong kini ki phang wa emkaam.
