Neiliang ki kynnah skur wa ki kynnah College ka West Jaiñtia Hills hapoh i ya yahkhmat u P. Suna wa ka S. Phawa, ynne ka sngi da lai pynsñiaw ki ha u Deputy Commissioner ka West Jaiñtia Hill District yeiwa ku dor i Petrol wa Diesel hapoh ka jylla iwa da ktah ya ki paidbah wa boon walang khamtam kiwa im hei mylla sngi yow yoh u baam hei miet. Da ong wa ini leh da ktah ko khamtam ya ki kynnah skur kiwa lai skur man-ka-sngi wa da ku ka bai kari.
Kamtæ da ong wa hadien wa kiwa yah kari hapoh Ri Loom Jaiñtia da pdiang ki yei dor bai kari wa thymme ka sorkar deiwa khlem pyrkhat næ kyrchaan ya ka MJACCV kawa dang pyrchah yei ku dor i phniang kari kamjooh leh dei wym pyrkhat yei ood ki paidbah wa boon wa lang khamtam ya ki kynnah skur wa College.
Hajrong ini da ong wa heipor wa booh yaki kyndon yada naka khlam, da kit 2 ngut heithaw 5 ngut wei da chim jar jiar i dor yaki khynnah skur wa kiwa chong yaw. Katni won nadooh wa pynmih hukum wa da hoi u kit bru kamwa jooh hachwa ka khlam heiwa nachwa yaki khynnah skur wa sap Uniform da chim na Ummulong cha jowai T. 10 katwa ya ki kynnah College da Scheme T.20. Tangwa katni da chim naki khynnah skur T. 30 katwa yaki khynnah College T. 50.
Kamtæ da kyntu leh heijooh i por ya ka seiñ kiwa yah kari kamai wow pyrkhat lang ya ki kynnah skur wa College, wow pyrkhat biang yei pynkudor bai kari iwa klem pyrkhat lang ya ki paidbah yong ka thaaiñ Jaiñtia.
