Ka Workers Power of Meghalaya (WPM) ka TUR waka Meghalaya & Greater Shillong Progressive Hawkers and Street Vendors Association (MGSPHSVA) da pynsñiaw ki yei sñiawkhia hajrong i chah thombor kiwa mylla sngi kiwa kreh mylla ha St. Xavier’s College Umoid, South West Khasi Hills.
Ki le seiñ da beiñ joor ki hajrong ini i thombor da ki damok wa ki bru wa chim kabu kiwa da dat da pynyap dusmon ya uwi na kini kiwa mylla.
Da dawa ya ki bor pulit wow kem smat wei wow pynchitom ya kiwa emkti. U su yaka bait lutsan katkam ka aiñ cha kiwa mynsoo wa kiwa ha yung yong uwa khlaad.
Da dawa leh ya ki bor pulit wa ka aiñ wow paitbniah bha wei wow pyntikna wa ym jia de kam ini hadien ha bood.
Da ong leh wa kiwa mylla kiwa wan na baar jylla wei khamtam dooh ki Contractor næ kiwa e kaam, toh u kitkhlieh ki wow pynbiang ya waroh ki emkaam kiwa yatoh wa kiwa mylla katkam ki kyndon aiñ.
Kiwa mylla, kiwa wan mylla cha ka jylla toh u yoh ki leh yei yada wa biang katkam ki aiñ, kam ka bai lutsan hawa jia i yap næ i mynsoo, kamjooh ka nong sngi katkam i dor wa booh daka aiñ, i chngaaiñ ha i lai i wan næ i chong i sah wa kiwi kiwi.
Ki aiñ yong ka jylla kiwa yatoh wa kiwa mylla toh u krehkaam ki deiwa pynrkhiñ wei ka sorkar wa ki Contractor næ kiwa e kaam toh u em ki yei kitkhia wei kitkhlieh. Heijooh i por da ong wa kiwa mylla leh toh u bood ki yaka aiñ yong ki bor waphær waphær kiwa em ha ka jylla nadooh ki aiñ District Council, Hima/Elaka wa sorkar.
