Jowai: Ka Public Health Centre (PHC) iong ka Nangbah kamjooh wa ki chnong Mookaswan, Umlarpang, Marjai, Mupliang wa kiwi tawan ki chnong wa em marjen. Ka PHC Nangbah toh kawi na ka PHC Riloom Jaintia kawa boon bha ki nong wan thooh dawai man ka sngi, kani won ka PHC ym ye ko u pynbiang ia ki dawai katkam i emkaam ki wa kjut neitæ i daw dup ki u lai cha jowai wa cha ka District Hospital Ialong.
Da ong haroh wa ia kani ka PHC kawa em ha Nangbah na ka liang ka tnat wa peit ia i cheit i khiah da yoo ko wada toh u pynku kyrdan noh ia kani ka PHC cha ka Community Health Centre (CHC) da boon snem katni. Da ong haroh wa ia ka yung u pynchna ia kani ka PHC cha ka CHC da dep chna nadooh i por u MLA u wa da da baam kwai cha khmat u Blai u ma Kyrmen Susngi, hadooh katni da ong wa ia i thmu iong ka sorkar nadooh i por u ma Kyrmen Susngi ym pu em u chem wa laibiet i han lada da dep chna ia ka yung nei bynta ka CHC da boon boon snem, ong ki khubor wa tikna.
Yei chakri iong kani ka PHC ia kiwa boon ki chnong da ong wa naka sorkar ka toh u peit ia i cheit i khiah da emkaam ko u pynku ia kani ka PHC cha ka CHC yow biang ki Doktor wa ki dawai yow ioh iarap ki wa kjut chitom, yow ioh ia i sumar i wa paka, lait noh na ki jait kjut wa hap u lai chah sumar cha ki Hospital wa heh kam ha Jowai næ cha Shillong.
Hei iatoh u pynku kyrdan ia kani ka PHC cha ka CHC da dep chna ia ka Hospital, ki yung wow sah ki Doktor, ki Nurse leh da dep chna la kattu katni snem nachwa, tangwa hadooh katni leh ym pu em u ye ki u pynkrehkam katkam i thmu iong ka sorkar wa ia ka PHC iong ka Namdong leh kawa da toh u pynku kyrdan cha ka Community Health Centre (CHC) dang sah beit ha ka jooh ka kyrdan PHC. Lada em ki wa kjut na ki chnong wa jngai wa ia ki manbei wa punkhon kiwa wan chah sumar, wan khakhon, da pynsah ki ha kani ka yung kawa da dep chna na ka bynta ka CHC Hospital, ong ki khubor wa tikna.
Discussion about this post