Kiwa chong chnong wa pura ka Garo Hills kiwa man kam ki Schedule Caste hapoh i pyrtuid ka seiñ South West Garo Hills Scheduled Caste Welfare Association da thoh ki cha u Montri Rangbah ka Meghalaya, u Conrad Sangma yow dawa 5% i bhah hapoh ka Job Reservation Policy hapoh ka jylla.
Ha ka dorkhat wa da e da ong wa ki Scheduled Caste (Dalit) toh kiwa da chna kyrpang neidaw ki toh kiwa da chah leh chilliang, chah lehbeiñ nadooh nachwa heiwa u Dr. Ambedkar da wanrah u ya ka Article 15(4) wa 16(4) yow booh bhah ya ki hapoh ka puræ puthi, i yoh khih yoh kreh iwa man kamjooh leh ya ki Schedule Tribe.
Kamtæ da ong wa ha Meghalaya da em ki Schedule Caste kamwa 25,000 ngut iwa man du 0.58% na i boon ki bru wei da man ki kiwa da dooh yei myntoi neibhah hapoh ka Reservation Policy ka jylla ym em booh bhah ya ki Schedule Caste. Nachwa da em 5% kawa neibynta ki Hajong, Koch, Rabha, Bodo wa Schedule Caste wei hadien wa da thap lang wa ki jaitbru Maan kam ki Schedule Tribe iwa mut wa 6 tylli ki jaitbru da yaknieh ki ya kani ka 5%.
Chooh chooh da ong wa kiwi ki jaitbru ri-loom katkam ka Meghalaya Reservation Policy da kheiñ ya ki kam ki Tribal katwa ki Schedule Caste won da kheiñ ya ki kam ki Dkhar namo ki Non-Tribal Community wei ini toh i wym ye u man neibhah ya ki ST wa SC da kheiñ kam ki jooh.
Da e nong muna leh wa ha Meghalaya hawa yaleh kreh MBBS, Nurse ym em uwi leh uwa man kam u Schedule Caste wa da chah jied kamjooh leh hawa lait kreh hapoh ka District Selection Committee (DSC) ka West Garo Hills heiwa na ki 17 tylli ki kreh yow man kam ki Surveillance Worker ymem uwi leh u Schedule Caste wa kiwa na General Category kiwa chah jied wei hadooh ki Unreserved Post leh da yoh da kiwi na ki jaitbru ri-loom ka Meghalaya iwa da man 100% da yoh da ki Scheduled Tribe iwa man leh pyrchah yei krehkaam ka Roster Reservation.
Hajrong ini waroh da ong wa ka Indian Constitution da e laad ko ya kitu ki wym yoh ki laad, kiwa tlot bor yow yoh yei bhah hei lai puræ wa i khih i kreh yow kyntu kynrong ya ki Schedule Caste hanla ka Meghalaya man ko kawa em hapoh ka Sixth Schedule, ki Schedule Caste leh man ki kam kiwa da tipmit kam ki Reserved Category hapoh ka riti synchaar ka ri, kamtæ da dawa 5% i bhah ya ki Schedule Caste hapoh ka Reservation Policy.
