Ki seiñbhalang na ri-loom Garo wa kynthup yaka ADE, AYWO, GSU, FAF wa FKJGP da pynsñiaw ki yei sñiaw dooh mynsien yei rukom krehkaam ka sorkar iwa daw ktah bha yaka Garo Hills neidaw wym bna ka sorkar wow leh iyi iyi yei wan chong wan sah ki bru iwa pyrchah yaka aiñ ha Wadagokgre, West Garo Hills.
Ki seiñ da ong ki wa kini ki bru toh kiwa baar kiwa da psiah chapoh ka jylla pyrchah yaka aiñ wei kini ki bru da wan sah ki ha i thaw wa ym du wa haap hapoh ka Sixth Schedule kamjooh leh iwa da tipmit da ka Archaeological Survey of India kam i thaw wa kyrpang yong u warim wajah, tangwa katni da sdang pynkylla chnong ya ini i thaw heiwa da sdang leh wow chna ya ki yung wa pura.
Da ong leh wa lada ki jaitbru Garo pyrchang ki wow chong chnong ha ini i thaw, da tikna wut wut da chah beh ki tangwa lada wan kiwa na baar kiwa leh ya ini i kaam wa pyrchah yaka aiñ, ka sorkar suki hi eh ko.
Chooh chooh ki seiñ da ong ki wa da pyrchah ki yaka CAA yow lait ya kam ini u jia i wei ini toh i chah hiar thma iwa kiaw kiaw kaw kaw iwa daw pynkylla dur yaka Meghalaya kawa da yada daka Sixth Schedule ka Constitution waka Land Transfer Act, 1971 kawa khang ya ki wym toh ki jaitbru ri loom ka Meghalaya khamtam kiwa wan psiah pyrchah yaka aiñ.
Da pyntip leh wa hapoh ka Section 20A ka Ancient Monument and Archaeological Site and Remains Act, 1958 wa ym chah wow chna ya iyi iyi hapoh 100 meter na ki thaw wa em iwa da chna u warim wajah. Hadooh kas ASI kamjooh ka sorkar pyrdi hap paan bor ki naka Expert Advisory Committee lada ong ki wow wanrah ya kiwon kiwon ki kaam pynroi hapoh ka Section 20A(4) ka Ancient Monuments and Archaeological Sites and Remains (Amendment and Validation ) Bill,2010 kawa da mynjur da u President ka ri haka 29-03-2010. Kamtæ da kylli yaka sorkar Meghalaya iyi i daw wa ym leh ko iyi iyi ya ini i tyngkheiñ yaka aiñ kamjooh yow yada ya ki thaw wa kyntang wa kyrpang yong u warim wajah.
