Ki wakreh ka Mawmluh Cherra Cement Limited (MCCL) hapoh ka lama yong ka MCCL Employees Union da dawa ki wa toh u pynbait noh ya i eh wa yachem da katai ka karkhana pynmih khyndaw-bilat yong ka sorkar hapoh ka Yung Dorbar Chan Aiñ.
Hawa klam cha ki laad pathai khubor ynne ka sngi, u President ka Union, u S. Lyngdoh da pyntip u wa ka Union da phah ko da ka chithi cha ki bor wa toh u pait yong ka karkhana, cha ka sorkar, cha kiwa mihkhmat ka Sohra wei kamjooh cha ki seiñ saiñpyrthai kiwa em ha ka jylla, wei ha katai ka chithi, ki wakreh da pynsñiaw ki wa kwah ki wa toh u yaklam noh ya i kaam yong ka MCCL hapoh ka Yung Dorbar wow chim ya i rai.
Da pyntip u wa ha ka yalang wa da pynman ha ka 26 tarik u Thohlakhmi (Feb), ka Union da rai khaddooh ko wow pynbor ya ka sorkar jylla wow pynbait noh ya ini i kaam wa waroh i eh, wei ka sorkar toh u su lut noh ya ka poisa wa ki wakreh toh u yoh ki khamtam ka tulop kawa da sahkut nadooh u snem 2018.
U Lyngdoh da ong u wa kamwa man kattæ, ka MCCL em ko ha i chitom iwa da pynman ya ki wakreh wow yakhih deiwa pynman yei chah thngan ha ka 10 u Kmaichonglad (Dec) u snem wa da dep neidaw wym yoh ya ka tulop nadooh u snem 2018.
