Ki wakreh ka MeECL hapoh ka chatri ka CCORMAU (Coordination Committee Of Registered MeECL (Employee) Associations and Unions) da pyntip ko wa lada ka sorkar ym ye ko su yaka tulop ki haka 14 tarik uni u bnai, haka 15 tarik daw pynman yaka Pen-Down Strike.
Da dawa leh wa yaka tulop toh u su hachwa ka 5 tarik man-u-bnai wei u su yaka ram ka MeECL du hadien wa dep su yaka tulop.
Lada ym yoh yaka tulop, haka 16 wa 17 tarik uni u bnai daw pynman yaka chah thngan da ki dkhot ka Executive Committee ka CCORMAU wa kiwi ki wakreh kiwa kwah u chimbynta.
Haka 21 tarik uni u bnai daw dam kreh ki wakreh nadooh ki sahep wa kiwi hadooh wow leh yaki kaam pynchna ya iwa sih nadooh 10 waje i step hadooh 4:30 i janmiet lait noh ki kaam wa yatoh waka chait i khiah wa kiwi ki wym hoi u dam.
Lada yaka tulop yong u Kmaichonglad (December) 2020, ym yoh haka 10-01-21 daw dam lai kreh wei da pynman leh yei lai paidbah na Lumjingshai cha ka Secretariat yow lai e dorkhat cha ka sorkar jylla.
Hadien ini lada ym leh ka sorkar iyi iyi leh, daw sdang saka yakhih wym bien u ya krehkaam namo ka Movement of Non-Cooperation ka wow sdang nadooh ka 18-01-21.
Lada ym mih soh mih sla ini i yakhih, haka 22-01-21 daw pyndooh bordiñ hapoh waroh kawi ka jylla.
Ka Union da rai ko leh wa ka soskular (MoU) wa da yasoi da ka MePDCL waka Byrnihat Industries Association yow yoh yei bai bordiñ wa kyrpang neibynta yong ki, da ong wa ini daw ktah ko yei yoh i kot ka MePDCL wei toh u pyndam noh chisyndon ya kani ka MoU.
Ki wakreh da pyrchah ki leh ya iwon iwon i thmu ka sorkar wow ekti noh ka sorkar yaka MeECL cha kiwon kiwon ki bru samen.
Chooh chooh da ong leh wa ym toh de wow chim chooh chooh yaki ram nalor kiwa da dep chim chwa.
Da dawa leh toh wow pyndam yaka Advanced Metering Infrastructure (Smart Metering) Project kamwa man ko kattæ wei wow e kti noh cha ka Energy Efficiency Services Limited (EESL) kawa man ka Company ka sorkar India kawa em bor wow leh ya ini hapoh ka National Smart Metering Program (NSMP) ka sorkar India.
Da dawa leh wow pynman noh kam ki wakreh pura kiwa katni wa man kam ki wakreh Contract.
