Ki warep harood ka wah Mynngot ynne ka sngi da pynman ki ya ka yalang paidbah hajrong i sur wow pyrchah hadooh wa yoh ki dei thoh ha kti na ka sorkar wa ya ka Umngot Hydro Electric Project u pyndooh pyndam noh neibhah wa ktah joor ko ya kiwa boon ki warep wa kiwa kamai ja-kpoh na ki kaam uiñke suwari lada kset (Dam) ya kani ka wah.
Kani ka yalang paidbah da pynman ha chnong Mynsang kawa em ha Mawkynrew Block wei kawa em hajan ka wah Mynngot wei ha kani ka yalang paidbah da emlang kiwa kitkaan ka JAC Against Umngot Hydro Electric Project wa kynthup ya ki seiñbhalang ka KSU, JSU, FKJGP, HNYF, TUR wa ka Meghalaya Rural Tourism Forum.
Ha kani ka yalang da emlang kiwa synchaar chnong na waroh ki chnong kiwa em ha lynter ka wah Mynngot kamjooh na ka Elaka Darrang.
Ha kani ka yalang da mih i sur na ki paidbah wei da kbai lang ki waroh deiwa ong wow pyrchah bait ki yei thmu u kset ya ka wah Mynngot.
Kiwa klam ha kani ka sngi kynthup ki ya u Shemphanghun Mukhim (Secretary JAC), u Dranik Mukhim (Mynsang), Dwiat Lynshiang (Sordar Mawsir), ka Saphina Suting (Umsaw), ka Kwinlang Nongbri (Ksanrngi), u Klip Lynshing (dkhot ka Raij Lynshing), u Pynshai Synjri (Sordar Nongjrong), u Pynskhem Mukhim (President Kynhun Nongrep).
Neiliang ki seiñbhalang kiwa klam kynthup ki na ka FKJGP u Bris Mawthoh, ka JSU u Treibor R Suchen, KSU u Shiningstar Kharbihkhiew, na ka TUR ka Angela Rngad, na kiwa im na ki kaam uiñke suwari u Reachingson Khongwang wa kiwi kiwi.
