Ka seiñ kiwa chet ja sngi ha ki skur hapoh ka lama ka All Jaiñtia Mid Day Meal Workers Union da thoh ki cha u Montri Rangbah ka jylla, u Conrad Sangma wow kyrpaad ya oo wow pynlait ya ka nong (Honorarium) kawa du T. 1000 chi bnai kawa da sah yong u bnai April-May-June 2022.
Da ong wa kiwa chet kamjooh kiwa yarap ya ki namo ki Helper kiwa bood ya ka Niamtre da emkaam ki ya kani ka poisa yow yoh ki wow lehkmen kamjooh yow pynkmen ya ki khon ki kti yong ki neibhah kattu daw sdang noh ki Behdieñkhlam.
Kamjooh da kypaad leh wow pynlait ya ka poisa chwa kawon kawon ka sngi wa kyrpang yong ki Christan, ki Sikh, ki Muslim, ki Jain yow ye ki wow lehkmen neibhah ki Mid Meal Cooks ka Meghalaya toh kiwa wan na kiwa boon ki niam yow ye ki u lehkmen deilang wa ki khon ki kti ki kam kiwi kiwa chong chnong ka ri.
Da pyntip leh cha u Montri Rangbah wa ka Behdieñkhlam ka Raij Jowai toh kawa daw sdang nadooh ka 11 tarik hadooh ka 14 tarik uni u bnai, ka Behdieñkhlam ka Raij Tuber daw sdang ko haka 19 hadooh ka 22 tarik uni u bnai wei daw pynbood leh sa kiwi de ki Behdieñkhlam.
Ka seiñ da e khublei Behdieñkhlam ko leh ya waroh kiwa chong chnong ka jylla kamjooh ka ri waroh kawi.
