Kiwa chong chnong ka Bakur da sñiawkhia ki yei em i kynrum-kynram hapoh ka chnong heiyatoh wa i rukom synchaar khadar chnong neibhah wot hadien wa da ujor cha ka District Council heiyatoh wa ka Sanad Waheh Chnong wa da kut ko la kamwa 9 bnai tam (kawa kut ha 25-05-21) tangwa hadooh katni ym em ka Dorbar Chnong jied waheh Chnong iwa man pyrchah ya ki kyndon ka Council.
Neiliang u Dolloi da ong u wa em ka chithi na ka District Council ha ka 21-08-2022 kawa da phah ya oo wow pynman ya ka Dorbar Chnong tangwa u Daniel Khongsit (Waheh Chnong) da paan por u ar bnai wow pynman ya ka Dorbar iwa mut hadooh u Naitung (Apr) 2022 neibynta wow pynbiang ya ki yukheiñ ka chnong.
Kamtæ kiwa chong chnong da yooluti ki wow man ka Dorbar katkam ki kyndon 31(2) yong ka aiñ ka JHADC kawa phah wow khut Dorbar ym duna le sien chi snem, khnang wow yaklam neibynta i bha i miat ka chnong ka thaw wa kiwi ki kaam tangwa nadooh wa man Waheh Chnong u Daniel hadooh katni ym jooh em khut Dorbar Chnong.
Hajrong ini ynnin ka sngi 23-02-2022 neiliang kiwa chong chnong da booh ki da ka Reminder Petition ha u CEM wow pynkynmoo hajrong kini ki kaam.
Da rai ki leh wow e por ar tayaw ya u CEM wa AO ka JHADC wow chim rai wow phah ya u Dolloi wow leh yeiwa emkaam.
Chooh chooh da pynsñiaw ki yei sñiawsih wa u Khongsit chirup wa ki kattu katni da yoh ki ya ka Order wow pynman da ka Fete ha i thaw ka chnong wei hawa kylli na ka SDO(C) da yoh yutip wa da e hadooh 3 tylli ki Order wow pynman ya ki tamasa Fete lyngba ka Dorbar Chnong wei da pyntip ko leh wa katwa ympu pynthymme ya kiwa kitkaam ka chnong ka sorkar dang tipmit ko du ya kiwa kitkaam warim.
Da kyrpaad ki leh ya ki bor wa pait wa neini kat wympu ye u pynbait ya ki kaam ha ka chnong ymtoh de wow ebor wow pynman ya ki tamasa hei pyrtuid ka Dorbar Chnong. Heijooh i por da kyrpaad ya kiwa bood u Khongsit wow burom ki leh ya ka yung krehkaam ka Dorbar Chnong Bakur khnang wow lait na iwon iwon i kynrum kynram.
Heijooh i por da kyrpaad ya u Daniel Khongsit wa ymtoh wow yapakhot ktieh ha ki kot khubor wei wow pynche tangwa lada em wow pynche toh du ha Dorbar kyntang.
