Ha ka 1 tarik uni u bnai, ka Movement For Change, Meghalaya deilang waka Dorbar Chnong Pammanik, West Jaiñtia Hills District da pynman ki ya ka yalang sñiawlem namo ka Condolence Meeting hajrong i chah pynyap beiñ ka (L) Rodit Langstang kawa na chnong Pammanik hi.
Ya kani ka manbei wa 44 snem i rta da pynyap da u kurim yong ka hi u Roibiang Pakma haka 31-05-2023 ha yung sah yong ki hi.
Deiwa yarap yong ka Movement For Change deilang wa kiwa ha-yung yong ka, da lai ujor pyrchah ya u kurim ko ha Phramer Traffic Cell haka 03-06-2023 wei da kem ya oo ha ka 26-06-2023 na ka chnong Mynsoo-B deiwa ya krehlang wa kani ka dorbar chnong.
Ha kani ka Condolence Meeting da ya chimbynta da ki khynnah skur waphær waphær kiwa em hapoh ka chnong Pammanik deilang wa kiwa sika skur kamjooh ki paidbah wa chong chnong kynthai wa chynrang.
Yaka yalang da pynman ha Community Hall yong ka chnong wei da pynbood sa ka lai paidbah na Community Hall chadooh cha yung yong kawa chah pynyap.
Ha yung yong kani da pynman yaka yalang wa tbian wei da em leh i thang mombati kam ka dak sñiawlem da ka khon kynthai yong ka, kiwa ha-yung ha-sem wa ki paidbah.
Ka Rodit Langstang da ieh ko chadien ya ka khon kynthai wa samen yong ka.
Kiwa klam ha kani ka sngi kynthup ki ya ka Yoophika Langstang neiliang ka kur Langstang, kiwa hikai na ki skur kiwa em ha kani ka chnong, ka President yong ka Village Organisation yong ka chnong Pammanik, ka Fecility Dhar, u P. Lyngkot, u P. Samaiang wa u C. Sungoh.
Kini kiwa klam waroh da beiñ joor ki ya u Roibiang Pakma uwa da nood wow pynyap pyn yaka kurim hi wei da kyntu wei dawa ki leh ya ki bor yong ka aiñ wow pynchitom ya uni bru katkam ki kyndon yong ka aiñ deiwa pasi syndon næ deiwa kset waroh chi rta.
Puræ leh: Khloh ki pulit yei metyap kawa suba chah tynyap ha u kurim
