Jowai: Ki paidbah ka chnong Bakur ynnin ka sngi da mih paidbah ki wow pynche hajrong i chah pynbaad wei kamjooh leh wow beiñ joor ya u Waheh Chnong u Daniel Khongsit heiyatoh wa iwa jia ya kawi ka manbei kawa da tip kam ka Kashmir Dkhar.
Ki paidbah da pynsñiaw ki yei sñiawsih wei phylla kamjooh leh yei chrai hajrong i pynchitom ya kani ka manbei da ka Executive Committee ka Dorbar Chnong wa kynthup ya u Waheh Chnong, u Secretary Chnong wa ar ngut ki manbei deiwa ong wa ki paidbah ym elaad ki ya ki bru wa chim kabu kiwa da pynemkaam bakla ya i pyrtuid wa i bor chnong iwa da daisarom ya i pyrtuid ka chnong deiwa leh ya ki kaam poh ya i rynyieñ ka manbei.
Da ong ki leh wa ki arngut ki manbei kiwa emkti ha kani ka kaam da chah kem wei em ki hapoh ka Judicial Custody katwa u Waheh Chnong, u Daniel Khongsit wa u General Secretary, u D. Donstan Khonglah won dang yut rieh ki hadien wa ka High Court da kyntait ko wow e ya ka Anticipatory Bail wei ki pulit leh dang thooh ki ya kini ki arngut.
Da pyntip ki wa kani ka bru da chah dat pynmynsoo ko, da pyndooh leh ya u khoo rachon, ka um chnong wei ym du kattæ da poi hadooh u pood wa da khi khulooiñ ki ka du neidaw wa ya awri ko wa ka janyung wei da maham leh wow beh chnong noh ya ka wei wow pynchitom ya ka yung yong ka waroh wei ya ini da leh da kiwa kitkaam ka chnong Bakur.
Neiliang ki khynroo ka chnong da pdiang ki yei bakla kani ka manbei heiyatoh wa i tyngkheiñ ko ya ki kyndon chnong tangwa ym pdiang won ki wow pynchitom ya ka hadooh uni u pood.
Heiyatoh wa ki khubor wa ong wa ya u sñiooh ka Kashmir da ah da ka payu yong ka, neiliang kiwa chong chnong da kyntait ki yeini neibhah ym em u kbai wyrta chnong hajrong ini wei ki paidbah da mih ki sop sop wow lai pynmih khubor wei kini man ki du kiwa hayung, ki lok wa kiwa bood ya ki dkhot ka EC ka chnong.
Da kam kiwa chong chnong wa u bru uwa kam pyrtuid kam u Richard Pohlong uwa pynlai ya ka yalang ymtoh u bru uwa chong chnong wa pura ka chnong wei ymtoh hi leh uwa na ka jooh ka Elaka wei waroh chi kattu chong sah u cha Shillong wei da wan u cha Bakur chwa wow man kani ka yalang.
Heiyatoh wa uwi u khynroo wa tip kam u Secretary Club wa tip kam ka BSWSC wei toh ka seiñ khynroo, kiwa chong chnong da kylli ki wa kammon wa ya i kaam President kani ka Club da ksoh da u Waheh Chnong, u Daniel Khongsit da boon snem kattu? Ynnu wa pynman ya ka General Meeting hapoh kini ki 7-8 snem wa dadep? Yi wa jied ya ki EC ka Club? Kammon thung Secretary ya u B. Pynngrope.
Da phylla ki leh wa ha ka yalang wa sop sop charood chnong ha Madan Football Bakur da pynbaad ki wa ka Kashmir toh ka bru kawa sih khlem ki sabut wow pynsakhiat yeini.
Neiliang ki khon khyrnoo ka chnong wa waroh kiwa chong chnong da iwi i sur da beiñ joor ki ya u Waheh Chnong, u Daniel Khongsit uwa da pynemkaam bakla ya i bor yong oo uwa da pynemkaam bakla leh ya ka Synjuk Ki Rangbah Shnong War Jaiñtia. Da beiñ ki leh ya u Dolloi ka Elaka uwa chong klikti wot hadien wa dadep e ya ka dorkhat wow pyndam chipor ya u Waheh Chnong wa u General Secretary katwa i takit dang lai i chaphrang tangwa da pynksan u wow thung biang da ki jooh ki bru ha ka EC khlem khut yalang næ pyntip paidbah.
Da kyntu ki leh ya u Dolloi wow khut ya ka Dorbar ka chnong tangwa hadooh katni ym mano u yeini wei ini da wanrah i yei syir mynsien hapyrdi kiwa chong chnong.
Chooh chooh da dawa ki na ka aiñ wow leh yeiwa emkaam deiwa pynrap leh wa ym em pyrchah ki ya ka Dorbar Chnong tangwa pyrchah ki ya ki bru wa pynemkama bakla ya i bor wa da e ha ki.
Kani man ko katkam ka Wyrta na kini hawah:
- U Lop Khonglah
- Ka Rosalia Gashnga (Manbei)
- U Eraldo Lamin (Waheh Chnong Warim)
- Ka Mashil Dkhar (Manbei)
- U Ricky Dhar
- Ka Biju Sohklet (Manbei)
