Ka Shillong Press Club da sñiawkhia ko ya iwa jia ynnin ka 20 tarik ha chnong Len Mawtap iwa em hapoh ka Sohiong Constituency heiwa uwa riñ dur ka T7 News u Meban Kharmalki da chah pynkhor wei chah tba kti u ha u Komel Nongbri u Sordar warim ka Sohiong.
Ini da jia heipor wa uwa lum khubor dang leh u yei kaam yong oo haka yalang paidbah kiwa chong chnong ka Len Mawtap kiwa da pyrchah yei pynchna yaka madan hapoh ka PMKKY Scheme hei lut wa T. 22.50 lak. Heiwa neiliang kiwa chong chnong da pyrchah ki ya ini neidaw wym pynche yei pynkrehkaam ya kani ka Scheme daka yung krehkaam u BDO.
Neiliang uwa lum khubor heipor wa pyrchang u wow yaklam wa u Nongbri yow yoh yei pynche hajrong ini i kaam, heithaw wow klam u, da pynyoo u dei bor iwa ym yahap de wa u bru uwa tip yaki kyndon kam uwa jooh ksoh kaam chnong.
Neiliang ka Shillong Press Club da dawa ko wow paan maap u Komel Nongbri syndon wei lada ym leh u ya ini, ka Shillong Press Club daw lai ko chakhmat katkam ki kyndon ka aiñ.
Ka SPC da ban joor ko yei kreh hajrong ka thong wow e yutip da kiwa tikna neibynta ki paidbah hanla em kiwa ym ye wow pdiang ya ini kiwa man ki khubor wa emkaam ki paidbah wow tip.
