Ki ar tylli ki seiñ ki kynthai wa kynthup ya ka Hynnñiewtrep Women Welfare & Development Organization (HWW&DO) wa ka Saiñdur Tipkur Tipkha Ieng Ehrngiew Hynñiewtrep (STIEH), ynnin i janmiet da pynman ki ya i thang mombati sñiawlem neibynta ki kynthai wa chah thombor wei chah tynyap ha Ri-Loom Jaiñtia.
Ya ini i thang mombati da pynman ha Lad Kiang Nangbah Govt. College Jowai heipor 6:00 i janmiet heiwa da wan chimbynta lang da ki seiñ kam ka Jaiñtia Student Movement (JSM), ka All Hynñiewtrep People United Front (AHPUF), ka Hynñiewtrep National People Federation (HNPF), ka West Jaiñtia National Council (WJNC), ka Hynñiewtrep Achik National Movement (HANM), ka All Jaiñtia Tourist & Commercial Vehicle Association (AJT&CVA) wa kiwi ki bru samen.
I thang mombati da man i leh iwa kyrpang neibynta ka Juhhi Bhoi, heiwa da chem ya i metyap yong ka na Chahtngit Jowai tangwa hadooh kini ki sngi ki pulit ympu ye ki wow e ya ka bui (Report) hajrong i daw wa yap ko.
Kiwa klam ha kani ka janmiet da dawa ki na u montri ki kaam pohyung wow pait ya ini i kaam wa ymye u wow chimkhia hajrong i chah thombor ki kynthai wa ki khynnah wei da toh i por wow hiar chuki noh u.
Ha kani ka sngi kiwa boon da beiñ joor ki khamtam ya ki damok kiwa chim yei mynsien bru ki wym em de i sñiaw para bru. Da ong ki leh wa ya kam kini ki bru, ka aiñ da toh u pynchitom ko ya ki deiwa pasi donhi.
Ha kani ka janmiet kiwa klam kynthup ki ya ka D. Tongper, President ka STIEH, ka N. Dkhar General Secretary JSM-WW, ka I. Suchiang- President, HWW&DO, President ka AJT&CVA u Pailakordor Lyngkot, u Nehemayah Tyngkan wa kiwi kiwi.
